Historisk arkiv

Vil ha meir konkurranse mellom advokatar

Historisk arkiv

Publisert under: Regjeringen Bondevik II

Utgiver: Justis- og politidepartementet

Juridiske tenester bør bli rimelegare og lettare å nå for privatpersonar og mindre verksemder. Det meiner Advokatkonkurranseutvalet som overleverte innstillinga si til justisministeren onsdag 16. oktober.

Pressemelding

Nr.: 91 - 2002
Dato: 16.10.2002
Kontaktperson: Utvalgsleder Einar Hope, tlf 55 95 93 44 og
Avdelingsdirektør Jan Gotaas, telefon 22 24 52 28

Vil ha meir konkurranse mellom advokatar

Juridiske tenester bør bli rimelegare og lettare å nå for privatpersonar og mindre verksemder. Det meiner Advokatkonkurranseutvalet som overleverte innstillinga si til justisministeren onsdag 16. oktober.

Advokatkonkurranseutvalet har sett på konkurransetilhøva i advokatbransjen og i resten av marknaden for juridiske tenester. Målet har vært å gjere juridiske tenester rimelegare og lettare å nå for folk flest. Utvalet meiner at ein må sikre ein effektiv konkurranse for å nå dette målet.

- Vi har slått fast at folk flest har for dårleg informasjon om både prisen på og andre sider ved juridiske tenester. Det gjer at mange synes det er vanskeleg å finne fram når dei treng juridisk hjelp, seier Einar Hope som er utvalsleiar.

- Det kan føre til at enkelte ikkje søkjer profesjonell hjelp, sjølv om dei treng det, seier han.

Utvalet gjer derfor framlegg om at dei som yter juridiske tenester må gi ei bindande berekning over kva hjelpen vil koste. Utvalet gjer også framlegg om å innføre ein spesialistordning for advokatar, tilsvarande den som gjeld for leger. Det vil gjere det enklare for folk å finne ein advokat som har den spesialkompetansen dei treng.

Utvalet meiner at det bør bli enklare å starte eiga verksemd for dei som ønskjer å yte juridiske tenester. Særleg når det gjeld enkel rådgiving – rådgiving i første line. Fleire vil starte eiga verksemd og tilbodet vil bli betre, dersom ein sett ned krava for å drive rådgiving i første line.

Alle bør ha høve til å skaffe seg naudsynt juridisk hjelp. Ein må legge til rette for at folk kan krevje rett, sjølv om dei ikkje har naudsynte juridiske kunnskapar og dei har svak økonomi. Utvalet meiner at ordningane med privat rettshjelpsforsikring og offentlig fri rettshjelp bør bli betre.

Utvalet meiner at meirverdiavgifta på juridiske tenester som blei innført sommaren 2001 førte til at juridiske tenester blei dyrare. Fleirtalet av utvalet meiner at privatpersonar og verksemder som ikkje er pliktige til å betale meirverdiavgift bør bli fritekne frå meirverdiavgift.

NOU 2002: 18 Rett til rett