I brev datert 13. september presiserer statsråd Morten A. Meyer i Arbeids- og administrasjonsdepartementet og statsråd Valgerd Svarstad Haugland i Kultur- og kyrkjedepartementet at Regjeringa legg til grunn fylgjande:

1. Det er ikkje aktuelt å gjera framlegg om ei lov om faste prisar på bøker.
2. Det er uaktuelt å vidareføra fastpris for skulebøker og det monopolet bokhandlane har på sal av denne bokgruppa etter gjeldande bransjeavtale, men visse overgangsføresegner vil kunna bli aksepterte. Vi minner dessutan om føresegna i § 9-4 i opplæringslova om at lærebøker skal liggja føre på bokmål og nynorsk til same tid og same pris.
3. Styresmaktene kan på visse vilkår akseptera ei fastprisordning for skjønnlitteratur og allmennlitteratur: Føresegner om fastpris må i tilfelle fastsetjast slik at ingen distribusjonskanalar får eksklusive høve til rabatt. Dette vil innebera at det kan fastsetjast ei rabattgrense i avtalen, men at alle distribusjonskanalane skal ha rett til å selja bøker med opp til same rabatten i den grad dei finn dette tenleg.
4. Dei naudsynte unntaka frå konkurranselova kan fastsetjast ved forskrift. Dersom ei slik forskrift skal kunna ta til å gjelda frå 1. januar 2005 lyt partane snarast råd leggja fram ei sameint tilråding.