Dei samla inntektene i statsrekneskapen for 2004 vart 746,4 milliardar kroner, medan utgiftene vart 622,2 milliardar kroner. Det syner stortingsmeldinga om statsrekneskapen for 2004, som vert lagt fram i dag. Netto inntekter frå oljeverksemda vart 203,4 milliardar kroner. Det oljekorrigerte underskotet vart dermed 79,2 milliardar kroner.

Det oljekorrigerte underskotet vart 79,2 milliardar kroner i 2004. Det vart i samband med nysalderinga av statsbudsjettet vedteke at 80,7 milliardar kroner av petroleumsinntektene skulle førast til inntekt på statsbudsjettet. Statsrekneskapen vert dermed gjort opp med eit overskot på 1,5 milliardar kroner.

Dei samla inntektene utanom oljeinntekter og lånetransaksjonar vart 0,9 milliardar kroner høgare i rekneskapen enn i nysalderinga. Skatte- og avgiftsinntektene vart 2,9 milliardar kroner lågare, medan renteinntekter og aksjeutbyte vart 0,2 milliardar kroner høgare. Andre inntekter er auka med til saman 3,6 milliardar kroner, der 1,6 milliardar kroner gjeld refusjonar for mellom anna utgifter knytte til arbeidsmarknadstiltak, lønn under sjukdom og fødsels- og adopsjonspengar.

Dei samla utgiftene utanom petroleumsverksemda og lånetransaksjonar vart netto 0,5 milliardar kroner lågare enn i nysalderinga. Dette har mellom anna si årsak i reduserte utgifter under folketrygda med 2,3 milliardar kroner og renteutgiftene som gjekk ned med 1,2 milliardar kroner. Utgiftene auka med 4,1 milliardar kroner, der 1,6 mrd. kroner er utgifter knytt til refusjonar som er omtalt ovanfor.

Det strukturelle, oljekorrigerte underskotet, der den oljekorrigerte budsjettbalansen mellom anna vert korrigert for verknaden av at konjunkturane skil seg frå det normale og endringar i rekneskapstilhøve, vart i 2004 58,8 milliardar kroner.

Den underliggjande, reelle veksten i utgiftene på statsbudsjettet frå 2003 til rekneskapen for 2004 utgjer om lag 2 prosent. I overslaget i revidert budsjett 2004 vart den underliggjande reelle veksten i utgiftene rekna til 2¼ pst, medan den i nysalderinga vart rekna til 2¾ prosent.

Rekneskapstala for Statens petroleumsfond syner at netto inntekter frå oljeverksemda vart 203,4 milliardar kroner. Av desse vart 80,7 milliardar kroner ført tilbake til statskassa, slik Stortinget vedtok ved nysalderinga av 2004-budsjettet. Renteinntektene og utbyte i fondet vart 33,3 milliardar kroner. Overskotet i Statens petroleumfond vart dermed 155,9 milliardar kroner. Det samla overskotet i statsrekneskapen og Statens petroleumsfond vart 157,4 milliardar kroner.

Bokført verdi av kapitalen i fondet auka med 164,5 milliardar kroner, frå 847,0 milliardar kroner per 31.12.2003 til 1 011,5 milliardar kroner per 31.12.2004. Av auken i kapitalen i fondet utgjer overskotet i fondet 155,9 milliardar kroner. I tillegg bidrog sal av Statoil aksjar til å auke fondet med 9,8 milliardar kroner, medan netto kursgevinstar og -tap reduserte fondet med 1,3 milliardar kroner.

Statsrekneskapen inneheld ein omtale av hovudtrekka i budsjettpolitikken for 2004, endringar frå budsjett til rekneskap, omtale av inntekter og utgifter og statens kapitalrekneskap.

Tal i mill. kroner