Utanom Nasjonalmuseet for kunst er det gjort framlegg om ein auke på nesten 10 millionar kroner i ordinære driftstilskot på museumssektoren. Vel halvparten går til Norsk Folkemuseum, som har fått overført ansvaret for å forvalta Bygdø Kongsgård. I tråd med føresetnadene skal m.a. gardsdrifta leggjast om i retning av historisk landbruk.

Resten av auken, i overkant av 4 millionar kroner, er foreslått fordelt på åtte ulike museum, av desse tre i kvart av fylka Nordland og Hordaland. Her er det i særleg grad skjedd prinsipielle avklaringar og substansielle endringar i institusjonsstrukturen, i samsvar med dei føresetnadene som ligg til grunn for det landsomfattande reformarbeidet. Dette vil i 2005 halda fram på fjerde året.

I Nordland får Helgeland Museum, Salten Museum og Museum Nord ein auke på
0,5 millionar kroner kvar, og tilsvarande gjeld i Hordland for Norges fiskerimuseum, Museumssenteret Salhus og Bryggens Museum. Det siste forvaltar dei statlege minnesmerka Rosenkranztårnet og Håkonshallen, og tilskotsauken skal dels kompensera for permanent reduksjon i eigeninntektene etter pålagde brannverntiltak i Rosenkrantztårnet, dels gi rom for nødvendig opprusting av Håkonshallen.

I tillegg er det foreslått 0,7 millionar kroner i auke til Telemark Museum for å styrkja Ibsen-formidlinga fram mot det nasjonale Ibsen-jubileet i 2006. Glomdalsmuseet i Hedmark får ein auke på 0,4 millionar kroner i samband med ferdigstilling av eit dokumentasjons- og formidlingssenter for romanifolkets kultur og historie.