Her skal dei nye studentbustadene til regjeringa byggast

- Studentbustader bidreg til eit trygt og rimeleg butilbod for studentane gjennom studietida. Difor har regjeringa prioritert å bygge historisk mange studentbustadar. Sidan 2014 har det kome pengar til 17 650 studentbustadar, seier forskings- og høgare utdanningsminister Henrik Asheim(H).

Det er studentsamskipnadene som søkjer om bygging av nye studentbustadar. Kunnskapsdepartementet har i år innvilga tilskot til alle søknadane, og det blir gjeve støtte til 17 prosjekt fordelte på 7 studentsamskipnadar og ei stifting. Tildelinga betyr at det blir gjeve tilskot på totalt nærare 600 millionar kroner. 

Dei største og fleste prosjekta i årets søknadar er knytte til nybygg. Studentsamskipnaden i Gjøvik, Ålesund og Trondheim (Sit) er den studentsamskipnaden som har søkt, og fått tilskot til flest studentbustadar. Fire av prosjekta til Sit er knytte til kjøp av eigedom som skal byggast om til nye studentbustadar, medan dei resterande ni er nybyggprosjekt.

Studentbustadbygginga har ikkje vorte forseinka av korona

Trass i eit krevjande år ser det ikkje ut til at pandemien har forseinka bygginga av studenbustadar.  I 2020 er det sett i gong bygging av over 2200 studenthyblar.

- Det er gode nyheiter både for byggebransjen og studentane at det ikkje har vore store forseinkingar av studentbustadbygginga grunna korona. Det betyr at vi kan sjå fram til innflyttingsklare studentbustader om ikkje alt for lenge, seier Asheim.

Bygginga har dei siste åtte åra vore høgare enn før. Sidan 2015 er det gjeve tilsegn til mellom 2200 og 2500 studentbustadar årleg. Unntaksåret var 2019 då det vart tildelt pengar til rundt 1500 hybeleiningar. At det vart gitt få tilsegner dette året kjem av at mange av søknadane var oppgraderingsprosjekt som ikkje vart godkjente.

Eit kriterie for å få pengar er at støtta skal gå til å auke delen av studentbustadar gjennom bygging av nye bustadar, eller ved kjøp eller ombygging av eksisterande bustadmasse.

Pilot på kombinerte sjukeheimar-/omsorgsbustadar og studentbustadar

Av den totale potten blir det sett av 7 450 000 kroner i tilskot til 20 hybeleiningar i samband med etablering av ein pilot der ein skal kombinerte sjukeheimar-/omsorgsbustadar og studentbustadar.

- Dette er eit veldig spennande prosjekt som kan gagne både studentane og dei eldre. Studentane får redusert leige ved å vere med  i sosiale aktiviter med dei eldre. Det kan bidra til å redusere einsemd og skape fine møte mellom generasjonar, seier Asheim. 

Det er førebels ikkje avgjort kven som skal drive dette prosjektet.

Tildelingar 2021:

Samskipnad	Prosjekt	Tiltak	Talet på  hybel-einingar	Maksimalt tilskot
Studentsamskipnaden i Agder	Kristiansand, Gimle 4	Nybygg	200	74 500 000
Studentsamskipnaden SiO	Kringsjå III	Nybygg	350	130 375 000
Studentsamskipnaden i Østfold	Halden	Nybygg	33	10 490 700
Studentsamskipnaden Gjøvik, Ålesund og Trondheim	Elgseter gt 23	Kjøp	35	13 037 500
Studentsamskipnaden Gjøvik, Ålesund og Trondheim	Rosenborg	Kjøp/ombygg	135	50 287 500
Studentsamskipnaden Gjøvik, Ålesund ogTrondheim	Moholt	Ombygg	45	16 762 500
Studentsamskipnaden Gjøvik, Ålesund og Trondheim	Kloster gt 56	Nybygg	17	6 332 500
Studentsamskipnaden Gjøvik, Ålesund og Trondheim	Røverdalen	Nybygg	15	4 768 500
Studentsamskipnaden Gjøvik, Ålesund og Trondheim	Nardovegen 12  og 14	Nybygg	435	162 037 000
Studentsamskipnaden på Vestlandet	Rommetveit	Ombygg/ Nybygg	6	1 907 400
Studentsamskipnaden på Vestlandet	Vieåsen	Nybygg	9	2 861 100
Studentsamskipnaden på Vestlandet	Fantoft	Ombygg/ Nybygg	29	10 802 500
Studentsamskipnaden på Vestlandet	Sandvikenbrygge	Kjøp/ombygg	51	18 997 500
Studentsamskipnaden på Vestlandet	Guridal Fossahaugene	Nybygg	93	29 564 700
Studentsamskipnaden i Stavanger	Rennebergstien	Nybygg	150	55 875 000
Studentsamskipnaden i Innlandet	Østregate 1	Kjøp/ombygg	13	4 132 700
Blindern  Studenterhjem	Nordfløy	Nybygg	14	5 215 000

Fakta:

I år vart forskrifta og retningslinjene for studentbustadtilskotet endra. I dei nye retningslinjene kan utgifter til kjøp av tomt bli haldne utanfor den totale kostnaden ein melder inn i søknaden. Det gir samskipnadane meir fleksiblitet når dei søkjer om tilskot.