Rundskriv V-002/2020 Om utarbeiding av søknad om tilskot for 2020 og statistikk

Rundskriv om utarbeiding av søknad om tilskot for 2020 og statistikk

1. Innleiing

Rundskrivet gir retningsliner for utfylling av budsjettsøknad for 2021 og statistikkskjema for 2019.

Budsjettsøknaden og statistikkskjemaet skal leverast via Altinn-portalen - www.altinn.no. Søknadsskjemaet vil vere tilgjengeleg i institusjonens innboks i Altinn i perioden 1. februar–1. mars 2020.

Det at Kulturdepartementet nyttar søknadsskjema i Altinn betyr at du som søker på vegne av verksemda, må ha elektronisk ID for å logge inn. Dette er den same ID-en som du brukar når du til dømes leverer sjølvmeldinga. Dersom du ikkje har elektronisk ID kan du lese om korleis du skaffar deg det på denne sida på ID-porten hos Digitaliseringsdirektoratet.

For å få tilgang til årets budsjett- og statistikkskjema må den, eller dei, som skal fylle ut på vegne av verksemda, først logge seg inn på sin eigen Altinn-profil. Les meir om pålogging og tildeling av roller for utfylling av budsjett- og statistikkskjema i vedlagde rettleiing.

På første side i søknadsskjemaet finn de gode tips om utfylling av skjemaet, mellom anna om val av riktig nettlesar, lagring av tekst og korleis ein under vegs i arbeidet kan sjå ein PDF-versjon av søknaden. Mange av felta i skjemaet har eigne hjelpetekstar.

Vi oppmodar om å lese informasjonen om utfylling og alle hjelpetekstar nøye, og å byrje på arbeidet med søknaden i god tid. 

Har du praktiske spørsmål om innlogging i Altinn, ta kontakt med Altinns portalhjelp. Har du spørsmål til utfyllinga av budsjett- og statistikkskjema, bruk denne adressa: skjemaveiledning@kud.dep.no.

Tilskuddsmottakere som er i samtaler om overføring til regionene i sammenheng med Regionreformen skal søke på vanlig måte (tekst må suppleres/kvalitetssikres av Mari)

2. Budsjettsøknad

Søknaden skal mellom anna innehalde:

• revidert rekneskap for 2019 
• arbeidsbudsjett 2020 
• årsrapport for 2019 
• søknad for 2021 
• statistikkskjema for publikum, aktivitetar, årsverk og tilsette

2.1 Revidert rekneskap for 2019

Rekneskapen inkludert balansen må innehalde alle utgifter og inntekter som institusjonen har hatt i løpet av året. Rekneskapen skal vere revidert. Vesentlege avvik mellom rekneskap og arbeidsbudsjett for 2019 skal kommenterast.
Tilskotsmottakarane må forklare årsaker til eit eventuelt negativt årsresultat og opplyse om korleis dette blir dekt inn. Det same gjeld eventuell negativ eigenkapital.

2.2 Arbeidsbudsjett for 2020

Tilskotsmottakar må utarbeide arbeidsbudsjett for 2020 – plan for disponering av samla utgifter og inntekter ved institusjonen. Arbeidsbudsjettet må innehalde alle utgifter og inntekter som tilskotsmottakar reknar med å få i løpet av budsjettåret.

2.3 Årsrapport for 2019

Rapporten skal gjere greie for tilskotsmottakars aktivitet og resultat i rapporteringsåret med utgangspunkt i de formåla som er omtalte i budsjettsøknaden for 2019 og krava som vart stilt i tilskotsbrevet for 2019.
Tilskotsmottakaren skal også gi ein statusrapport om dei vesentlegaste forholda ved den økonomiske situasjonen.

2.4 Søknad for 2021

Tilskotsmottakar må i søknaden for 2021 oppgi kva som er formålet med verksemda. Formålet skal vere mest mogleg dekkande for tilskotsmottakars samla aktivitet.

Tilskotsmottakar skal òg gjere greie for planlagd drift i søknadsåret. Omtalen skal ta utgangspunkt i ein situasjon der driftstilskotet blir vidareført på same nivå som i dag. Talbudsjettet må innehalde alle utgifter og inntekter institusjonen reknar med å få i løpet av 2021. Inntekter og utgifter må balansere. Tilskot frå andre enn Kulturdepartementet, fylkeskommunar, kommunar og Den kulturelle skolesekken skal spesifiserast i særskilde felt.

Søknaden kan innehalde maksimalt tre nye tiltak med behov for auke i tilskotet. Forslag til slike tiltak krev særskild grunngiving med plan for finansiering. Eventuelle forslag må innehalde ein kort omtale av tiltaket der ein gjer greie for behovet for og målet med tiltaket. I tillegg må tilskotsmottakar vurdere om tiltaket kan gjennomførast ved omdisponering av dei ressursane som er til disposisjon, og kva konsekvensane av dette vil vere. Eventuelle forslag om nye tiltak med behov for auke i tilskotet skal registrerast i prioritert rekkjefølgje.

2.5 Statistikkskjema

Tilskotsmottakarane skal fylle ut skjemaet for statistikk over aktivitetar, publikum, tilsette og årsverk.

2.6 Endringar i kontonummer og adresse

Om de har endra kontonummer og/eller adresse må dette meldast til postmottak@kud.dep.no. Det er ikkje nok å endre desse opplysningane i budsjettsøknadsskjemaet. Endring av navn på verksemda i Altinn må meldast til Enhetsregisteret.

3. Fristar i 2020

Frist for å levere søknaden er 1. mars 2020 kl. 23.59.

Søknadsskjemaet vil vere tilgjengeleg i Altinn frå 1. februar, og institusjonen kan arbeide med og gjere endringar i søknaden fram til fristen går ut. Søknadsfristen er absolutt og det vert ikkje gitt utsetjing, uavhengig av årsak. Søknader som vert sendt inn etter fristen vil verte avviste automatisk.

Den 15. desember 2017 vedtok Stortinget endringar i rekneskapslova som inneber at kravet til årsmelding for små føretak er oppheva. I tillegg til rapporteringa i nettportalen, skal tilskotsmottakarar som er definert som små føretak etter krava i rekneskapslova, sende inn revidert rekneskap for 2019 med revisormelding til postmottak@kud.dep.no så snart dokumenta ligg føre og seinast 1. mars 2020.

Med helsing

Christine Hamnen (e.f.)
ekspedisjonssjef

Cathrine Landa Paulsen
seniorrådgjevar