Statsrekneskapen for 2008 lagt fram

Det oljekorrigerte underskotet i statsrekneskapen for 2008 vart 11,8 milliardar kroner. Det er 3,4 milliardar kroner meir enn i nysaldert budsjett, vedteke i desember 2008. Avgiftsinntektene vart noko lågare enn anslått i nysaldert budsjett som følje av lågare avgiftsinngang mot slutten av året grunna  konjunkturomslaget. Samstundes auka andre inntekter slik at dei samla inntektene vart drygt 0,1 milliardar kroner høgare enn i nysalderinga. Utgiftene vart 3,6 milliardar kroner høgare enn lagt til grunn i nysalderinga, og var i stor grad knytte til departementa sine fullmakter til å nytte meirinntekter til meirutgifter.

Under handsaminga av nysaldert budsjett i desember 2008 vedtok Stortinget den røynlege overføringa på 8,4 milliardar kroner frå Statens pensjonsfond – Utland til statsbudsjettet, tilsvarande det oljekorrigerte underskotet i nysalderinga. Det oljekorrigerte underskotet vart 11,8 milliardar kroner i rekneskapen, og statsrekneskapen vert dermed gjort opp med eit underskot på 3,4 milliardar kroner.

Bruken av petroleumsinntekter, målt ved det strukturelle, oljekorrigerte underskotet for 2008, er no rekna til 72,2 milliardar kroner. Dette er 4,6 milliardar kroner lågare enn anslaget i Nasjonalbudsjettet 2008 og 0,5 milliardar kroner lågare enn rekna i nysalderinga. Det strukturelle, oljekorrigerte underskotet kjem fram ved at den oljekorrigerte budsjettbalansen mellom anna vert korrigert for verknaden av konjunkturane på utgifts- og inntektssidene i budsjettet og for endringar i rekneskapshøve.

Rekneskapstala for Statens pensjonsfond – Utland syner at netto inntekter frå oljeverksemda vart 415,9 milliardar kroner. Av desse vart 8,4 milliardar kroner ført tilbake til statskassa, slik Stortinget vedtok ved nysalderinga av 2008-budsjettet. Netto renteinntekter og utbyte i Statens pensjonsfond – Utland vart 97,8 milliardar kroner, medan renteinntekter og utbyte i Statens pensjonsfond – Noreg vart 5,3 milliardar kroner. Overskotet i Statens pensjonsfond, etter nasjonalrekneskapen sine definisjonar, vart dermed 510,6 milliardar kroner. Av dette er overskotet i Statens pensjonsfond – Utland 505,3 milliardar kroner. Samla overskot i statsbudsjettet og Statens pensjonsfond vert 507,2 milliardar kroner.

Ved utgangen av 2008 var den bokførte verdien av Statens pensjonsfond – Utland 2 279,6 milliardar kroner. Det er drygt 261,1 milliardar kroner meir enn ved utgangen av 2007: Overskotet auka verdien av fondet med 505,3 milliardar kroner. Realiserte tap på 102,9 milliardar kroner og urealiserte tap på 630,2 milliardar kroner reduserte verdien, medan  svekka kronekurs auka verdien av fondet målt i norske kroner med 506,2 milliardar kroner. Staten sitt kjøp av aksjar i StatoilHydro ASA vart finansiert i fondet og reduserte verdien av fondet med 17,1 milliardar kroner.

Frå utgangen av 2007 til utgangen av 2008 vart kapitalen i Statens Pensjonsfond – Noreg redusert med 29,6 milliardar kroner, frå 117,3 milliardar kroner til 87,8 milliardar kroner. Endringa kjem av renteinntekter og utbyte på 5,3 milliardar kroner og 34,9 milliardar kroner i samla kurstap på aksje- og renteplasseringane.

Hovudtal frå statsrekneskapen 2008 (tal i mill. kroner)	Saldert budsjett	Nysaldert budsjett	Rekneskap
1. Statsbudsjettet
Inntekter i alt	1 036 759	1 182 130	1 182 631
Inntekter frå petroleumsverksemda	328 073	437 340	437 705
Inntekter utanom petroleumsverksemda	708 686	744 790	744 927
Utgifter i alt	771 404	777 601	778 563
Utgifter til petroleumsverksemda	26 300	24 441	21 839
Utgifter utanom petroleumsverksemda	745 104	753 160	756 724
Statsbudsjettet sitt oljekorrigerte overskot	-36 418	-8 370	-11 797
+ Overført frå Statens pensjonsfond – Utland	36 418	8 370	8 370
= Statsbudsjettet sitt overskot	0	0	-3 427
2. Statens pensjonsfond
Statsbudsjettet sin netto kontantstraum frå petroleumsverksemda	301 773	412 899	415 866
- Overført til statsbudsjettet	36 418	8 370	8 370
+ Renteinntekter og utbyte i fondet *	78 600	84 200	103 119
= Overskot i Statens pensjonsfond	343 955	488 729	510 615
3. Samla overskot på Statsbudsjettet og Statens pensjonsfond
	343 955	488 729	507 188