Historisk kultursatsing i Sør-Trøndelag

- Regjeringa foreslår ei historisk sterk kultursatsing i Sør-Trøndelag. I tillegg til løyvinga til Rockheim legg regjeringa opp til eit monaleg lyft for musea gjennom midlar til konsolidering. Dessutan blir scenekunst og musikk også styrkt, seier kultur- og kyrkjeminister Trond Giske. 

Regjeringa foreslår ei løyving på 55 millionar kroner i investeringstilskot til Nasjonalt senter for pop og rock, Rockheim, og eit driftstilskot på 22,5 millionar kroner.

I tillegg er det forslag om å løyve 4,5 millionar kroner til ei konsolidert museumseining frå 1. januar 2009. Den nye eininga vil bestå av Museet Kystens Arv, Kystmuseet i Sør-Trøndelag, Orkla Industrimuseum, Ringve, Trøndelag Folkemuseum og Trondheim Kunstmuseum.

Regjeringa foreslår også ei sterk satsing på scenekunst i Trøndelag gjennom ei løyving på 1,5 millionar kroner til Teater Avant Garden. Teatret vil med dette forslaget få eit samla statstilskot vel 2,5 millionar kroner, som er ei dobling i høve til 2008. Tilskotet til Trøndelag Teater aukar med 3,5 millionar kroner til 53,9 millionar kroner.

Også på musikkområdet er det forslag om store tillegg. Trondheim Symfoniorkester får ein auke i tilskotet på 5,3 millionar kroner til vel 53,7 millionar kroner. Musikkteatret i Trondheim får 0,5 millionar i auke til 4,2 millionar kroner. Trondheim Jazzorkester vil få 0,36 millionar i auke til i alt 1,4 millionar kroner. Trondheim Kammermusikkfestival får ein auke på 0,2 millionar kroner til 1,4 millionar, og Trondheimssolistene – Juniorsolistene får ein auke på 0,5 millionar kroner, totalt vel 2,4 millionar kroner.

Fordelinga av auken til kulturtiltak i Sør-Trøndelag ser slik ut:

                                                                                                                                           

 

	Tilskot  2008	Samla auke	Forslag  2009
Nasjonalt opplevelsessenter for pop og rock	35 000	20 000	55 000
Birka	802	198	1 000
Midtnorsk Jazzsenter	1 660	173	1 833
Trondheim elektroniske kunstsenter (TEKS)	866	500	1 366
Trondheim Int. Chamber Music Academy & Competition	486	214	700
Trondheim Symfoniorkester	48 447	5 301	53 748
Olavsfestdagene	6 309	1 500	7 809
Trondheim Jazzorkester	1 043	357	1 400
Trondheim Kammermusikkfestival	1 200	200	1 400
Trondheimsolistene, juniorsolistene	1 931	500	2 431
Trøndelag Teater	50 415	3 500	53 915
Musikkteatret i Trondheim	3 713	500	4 213
Cirka Teater	585	100	685
Teater Avant Garden	1 064	1 500	2 564
Museumskonsolidering	27 559	5 712	33 271
Trondheim Kunstmuseum	5 193	2 020	7 213
Midtnorsk Vitensenter - skolesekkmidler		702	702
Rockheim driftsmidler	5 000	17 500	22 500