Historisk arkiv

Jordvern: Jordvernet skal styrkast

Historisk arkiv

Publisert under: Regjeringen Stoltenberg II

Utgjevar: Landbruks- og matdepartementet

Jordvern: For å styrke jordvernet skal eit utval gi status i arbeidet med å nå målet om å halvere nedbygging av dyrka jord, vurdere eksisterande verkemiddel og foreslå nye.

Jordvern: For å styrke jordvernet skal eit utval gi status i arbeidet med å nå målet om å halvere nedbygging av dyrka jord, vurdere eksisterande verkemiddel og foreslå nye. Landbruksdirektør Jon Ola Syrstad i Rogaland skal leie utvalet, som skal avgi rapport innan utgangen av 2007.

Halvere nedbygginga
- Regjeringa ønskjer å styrke jordvernet, og har sett seg som mål å halvere den årlege omdisponeringa av dei mest verdfulle jordressursane innan 2010, sier landbruks- og matminister Terje Riis-Johansen.  - Dyrka og dyrkbar jord er ein grunnleggjande ressurs for å sikre matforsyning på kort og lang sikt, og er ein viktig del av kulturlandskapet. Dei siste åra er det rapportert om årleg omdisponering på mellom 15000 og 20000 dekar dyrka og dyrkbart jordbruksareal. Med eit dyrka areal på berre 3 % av landarealet i Norge, er dette urovekkande, seier Riis-Johansen.

En million dekar bygd ned
- Vi har hatt forbod mot omdisponering av dyrka jord i 50 år. På same tid er meir enn 1 million dekar dyrka jord brukt til utbygging, seier landbruksdirektør Jon Ola Syrstad. -  Presset på jorda er større enn nokon gong. Gjennom vekst i byar og tettstader og spreidd utbygging i jordbrukslandskapet blir den beste jorda til byggetomter. Dersom vi skal gi etterkomarane våre høve til å dyrke eigen mat på eigen jord, må vi styrke jordvernet. Derfor ser eg fram til arbeidet i dette utvalet, seier Syrstad.

Skal foreslå nye verkemiddel
Utvalet er gitt følgjande mandat:

  • Gi  status på arbeidet med å nå målsettinga om at årleg omdisponering av dei mest verdfulle jordressursane skal halverast innan 2010
  • Vurdere eksisterande verkemiddel for eit sterkt jordvern
  • Foreslå nye verkemiddel for å styrke jordvernet

Rapport innan utgangen av 2007
Utvalet skal avgi rapport til Landbruks- og matdepartementet innan utgangen av 2007 med delrapportering etter nærare avtale. I tillegg skal arbeidsgruppa gi råd til departementet i samband med arbeidet med ny plan- og bygningslov. Det er også føresetnaden at arbeidsgruppa under arbeidet skal halde tematiske møter, til dømes om samferdsleområdet, med aktuelle  institusjonar og organisasjonar, herunder miljø- og landbruksorganisasjonar.

Samansetting
Landbruksdirektør Jon Ola Syrstad, Rogaland, leiar
Landbruksdirektør Astrid Aass, Buskerud
Direktør Arne Bardalen, Norsk institutt for skog og landskap
Fylkeslandbruksstyreleder Kari Munthe, Akershus
Rådgiver Ragnhild Saakvitne, Eidsberg kommune
Seksjonssjef Geir Grønningsæter, Statens landbruksforvaltning
Avdelingsdirektør Geir Dalholt, Landbruks- og matdepartementet
Sekretariat: Landbruks- og matdepartementet og Statens landbruksforvaltning. 

Kommunane gjer vedtak
Det er i dag kommunane som i hovudsak gjer vedtak om omdisponering av areal, og dei er derfor dei viktigaste aktørane i arbeidet med å nå målet for jordvern. I tillegg har staten ei viktig rolle i samband med store samfunnsmessige utbyggingar, som til dømes samferdsletiltak. Fylkeslandbruksstyra kan nekte omdisponering i saker som gjeld jordbruksareal, og Statens landbruksforvaltning fekk i 2006 tilsvarande fullmakt i saker der Fylkesmannen som saksførebuar har tilrådd å nekte, men der fylkeslandbruksstyret ikkje har følgt dette opp.

Mangelfull rapportering
Kommunane skal rapportere den årlege omdisponeringa gjennom KOSTRA. Tala er usikre pga mangelfull rapportering. Innrapporteringa så langt viser at omdisponeringstakten er for høg i høve til måla for jordvern. Landbruks- og matdepartementet meiner derfor at det er nødvendig med særskilt merksemd på jordvernet, både lokalt og sentralt dersom måla skal bli nådd.

   

Landbruksdirektør Jon Ola Syrstad i Rogaland har fått i oppdrag av landbruks- og matminister Terje Riis-Johansen å vurdere tiltak for å styrke jordvernet. Foto: LMD
Landbruksdirektør Jon Ola Syrstad i Rogaland har fått i oppdrag av landbruks- og matminister Terje Riis-Johansen å vurdere tiltak for å styrke jordvernet. Foto: LMD

Jordvern: For å styrke arbeidet med jordvernet skal eit utval gi status i arbeidet med å halvere nedbygging av dyrka jord, vurdere eksisterande verkemiddel og foreslå nye.