CO2-handtering – ei viktig sak for regjeringa

Regjeringa føreslår å løyve om lag 3,4 milliardar kroner til CO₂-handtering i statsbudsjettet for 2013. Dette omfattar drift og vidareutvikling av teknologisenteret på Mongstad (TCM), planlegging av fullskalaanlegget på Mongstad, drift av Gassnova SF, forsking og teknologiutvikling og internasjonalt arbeid for å skape forståing for CO₂-handtering som eit viktig klimapolitisk tiltak. 

-CO₂-handtering er viktig i energi- og klimapolitikken. Eg er svært stolt over Teknologisenteret på Mongstad, som vi opna i mai. Det er stor merksemd rundt TCM internasjonalt, og dette viser at den omfattande satsinga vår på CO₂-handtering har stor verdi, seier olje- og energiminister Ola Borten Moe.

Teknologisenteret for CO₂-fangst på Mongstad (TCM) er mellom dei første og største testanlegg for CO₂-fangst i verda. Teknologisenteret vart opna i mai og testinga har starta. Regjeringa føreslår å løyve i underkant av 2 milliardar kroner til TCM. Dette inkluderer statens del av driftskostnadene, vidareutvikling av dei eksisterande testanlegga og betaling for dei forskingstenestene som blir utført på TCM.

Regjeringa foreslår om lag 800 millionar kroner til arbeidet med planlegging og utvikling av fullskala CO₂-fangst på Mongstad. Eit omfattande teknologikvalifiseringsprogram er sett i gong, der målet er å kvalifisere minst ein fangstteknologi som kan brukast i fangstanlegget. Fem ulike teknologileverandørar deltek. Arbeidet i 2013 vil få prosjektet nærare konseptval gjennom oppfølgjing av inngåtte kontraktar, både knytt til teknologikvalifiseringa og studiar av omkringliggjande anlegg og hjelpesystem. Dagens informasjon tilseier at regjeringa skal kunne leggje fram eit samla beslutningsgrunnlag for Stortinget seinast i 2016.

Planlegginga av transport og lagring av CO₂ frå Mongstad er samordna med arbeidet med CO₂-fangstanlegget. Det er føreslått løyvd 289 mill. kroner til planlegginga av ei transport- og lagerløysing for CO₂ frå Mongstad. Dette omfattar også arbeid som skal bidra til auka kunnskap om potensial for framtidig lagring av CO₂ på norsk kontinentalsokkel.

Regjeringa føreslår eit driftsbudsjett for Gassnova SF på 93 millionar kroner i 2013. Gassnova forvaltar statens interesser i CO₂-handteringsprosjekta, og bidreg til gjennomføring av CLIMIT-programmet i samarbeid med Noregs forskingsråd. Samla vil CLIMIT få tilført om lag 170 millionar kroner i 2013.

Regjeringa føreslår å løyve 42 mill. kroner for å vidareføre kartlegginga og analysen av moglegheitene for fullskala CO₂-handtering i Noreg utover fullskalaprosjektet på Mongstad. Utgreiinga skal gi styresmaktene eit betre kunnskapsgrunnlag om moglege CO₂-handteringsprosjekt i Noreg både innan kraftproduksjon og industri. Gassnova gjennomfører studien.