Diskuterte situasjonen i Zimbabwe

Statsminister Jens Stoltenberg møtte i dag opposisjonsleiaren i Zimbabwe, Morgan Tsvangirai. Stoltenberg oppfordra styresmaktene i Zimbabwe om snarast å offentleggjera resultata frå presidenvalet i landet.

– Det er viktig å respektera grunnleggjande demokratiske prinsipp og snarast finna ei løysing på den kritiske situasjonen i landet, seier Stoltenberg.

Resultatet frå presidentvalet i Zimbabwe i slutten av mars er enno ikkje offentleggjort. Statsministeren vil også drøfta situasjonen i Zimbabwe med stats- og regjeringssjefar frå det sørlege Afrika på SADCs utviklingskonferanse (Southern African Development Community) på Mauritius i helga.

Morgan Tsvangirai og Jens Stoltenberg. Foto: SMK.

Noreg og Norden har spesielle band til Zimbabwe med si støtte til frigjeringskampen. Noreg bidrar i dag med midlar til styrking av demokrati, menneskerettar og det sivile samfunnet i Zimbabwe.

Stoltenberg møtte Tsvangirai i Johannesburg, rett etter møtet med Sør-Afrikas tidlegare president Nelson Mandela.