Høringssvar fra Deanu Sámiid Searvi

Dato: 28.02.2020

Gulaskuddancealkámuš - árvalus rievdadusaide sámelágas (konsultašuvnnat) ja bagadangihpa gielddaide ja fylkkagielddaide.

/

Høringsuttalelse til forslag til endringer i sameloven mv. (konsultasjoner) og veileder for kommuner og fylkeskommuner

Deanu ja Deatnogátte Sámiid searvvit dorjot árvalusa ahte bidjat láhkii konsultašuvnnageatnegasvuođa sámi beroštumiin ja maiddái bagadangihpaárvalusa. Mii jáhkkit bagadangihppaga hui buorren reaidun gielddaide go dat čájeta mo konsultašuvnnat sáhttet eastit riidduid ja buvttadit beaktilut proseassaid.

Deanu ja Deatnogátte Sámiid Servviid mielas lea doaibman bures dálá konsultašuvnna ortnet gaskkal Sámedikki ja stáhta. Ja vaikko lea ain olu mii sáhttá buoriduvvot de lea gulahallan šaddan sihke beaktilut ja njuovžilut go ovdal lei.

Deanu ja Deatnogátte Sámiid Searvvit čujuhit erenoamážit UNDRIP artihkkal 19`ii, ILO-Soahpamuš 169 artihkkal 6`ii ja ON siviila ja politihkkálaš vuoigatvuođaid julggaštuša artihkkal 27`ii ja fuomášahttá ahte konsultašuvnnaid láhkanannen nanne maid Norgga stáhta álbmotrievttálaš geatnegasvuođaid duohtandahkama ja daid namutuvvon artihkkaliid implementerema.

Deanu ja Deatnogátte Sámiid Searvvit leat ovttaoaivilis sihke Sámeriektelávdegottin, ráđđehusain ja Sámedikkin ahte stáhtas lea geatnegasvuohta konsulteret buot eiseváldedásiin. Maiddái gieldda- ja fylkkadásiin.

Deanu ja Deatnogátte Sámiid Searvvit muittuhit ahte go konsulterejuvvo man ge dásis de ferte dát dáhpátuvvat álbmotrievttálaš prinsihpaid vuođul, nammalassii ahte galgá dieđusge geahččalit boahtit ovttaoaivilvuhtii muhto ahte eiseváldi aŋkke ii sáhte dahkat mearrádusaid mat rihkkot eará vuoigatvuođaid ja geatnegasvuođaid sámiid ektui, vaikko ii boađášii ovttaoaivilvuohta konsultašuvnnaid bokte.

Deanu ja Deatnogátte Sámiid Searvvit jáhkkiba ahte dákkár konsulašuvnnat sáhttet hui ávkkálaččat ja buorit iežamet gielddas ge. Mis leat olu áigeguovdilis áššit nu mo ovdamearkka dihtii sámi oahpahus, báikenamat, vuorrasiid dilit, fuolahusbálvalusat ja eará maiguin dárbbu mielde konsultašuvnnat sáhttet leat beaktilat ja ávkkálaččat sihke gildii ja sámi berošteddjiide.

Deanu ja Deatnogátte Sámiid Servviid bealis mii lea geargosat buorredáhtolašvuođain ja beaktilvuođain searvat dákkár proseassaide.

Beaska Niillas

Jođiheaddji

Deanu Sámiid Searvi

Máret Guhttor

Jođiheaddji

Deatnogátte Sámiid Searvi