1 Innleiing og bakgrunn

Departementet viser til Prop. 194 S (2012–2013) Utbygging og finansiering av E134 på strekninga Seljord – Åmot i kommunane Seljord, Kviteseid, Tokke og Vinje i Telemark, handsama i statsråd 20. september 2013 og Prop. 1 S Tillegg 1 (2013–2014).

Utbygginga gjeld fire delstrekningar på E134 mellom Seljord og Åmot. Nesten heile strekninga mellom Seljord og Åmot vil få gul midtstripe og jamn og god standard etter utbetringa, noko som vil bidra til betre framkomst og trafikktryggleik. Samla kostnad for dei fire delstrekningane er rekna til 315 mill. 2013-kr. Det framgår av Prop. 194 S (2012–2013) at prosjektet er tenkt finansiert med 284 mill. kr i bompengar og 31 mill. kr i statlege midlar. Det er føresett førebuande arbeid i 2014, anleggsstart i 2015 og ferdigstilling i 2018.