1 Innleiing
Kulturdepartementet legg med dette fram den årlege stortingsmeldinga om verksemda på medieområdet i 1997. Grunnlaget for meldinga er i hovudsak årsmeldingane frå allmennkringkastarane, Statens medieforvaltning og Allmennkringkastingsrådet. I tillegg til årsmeldinga, har NRK utarbeidd ein eigen allmennkringkastingsrekneskap. Desse dokumenta følgjer meldinga som uprenta vedlegg.
Då Stortinget handsama St.meld. nr. 62 (1996-97), Kringkasting og dagspresse 1996 m.v., uttalte komiteen følgjande:
«Komiteen vil handsame mediepolitiske problemstillingar i eigne saker, og gje meir generelle kommentarar knytta til dei årlege meldingane om presse og kringkasting», jf. Innst. S. nr. 103 (1997-98).
Omtalen i denne meldinga er difor avgrensa til å gjelde verksemda på kringkastings- og presseområdet i 1997.
I debatten om St.meld. nr. 62 sa statsråd Lahnstein m.a. følgjande:
«...Jeg kan slutte meg til ønsket fra komiteen om at prinsipielle mediepolitiske spørsmål bør fremmes som egne saker og ikke som ledd i de årlige meldingene. Det vil føre til at innholdet i disse meldingene blir begrenset til en kort omtale av aktiviteten hos allmennkringkasterne og utviklingen for øvrig.
De årlige meldingene kan ikke legges fram før allmennkringkasterne har lagt fram sine årsrapporter. Dette skjer vanligvis i løpet av 2. kvartal. Det gjør det vanskelig å legge fram de årlige meldingene så tidlig at Stortinget kan rekke å behandle dem før sommeren, og dermed skjer debatten i praksis, som nå, mer enn ett år etter perioden meldingene omhandler.
Dette kan tilsi at de årlige meldinger bør erstattes av en årlig muntlig redegjørelse om aktiviteten i allmennkringkasterne og lokalkringkastingen og om den generelle mediepolitiske utviklingen for øvrig. Dersom en slik redegjørelse holdes i vårsesjonen, vil debatten bli mer aktuell, og Stortingets synspunkter vil bli kjent for allmennkringkasterne og de øvrige medieaktørene på et hensiktsmessig tidspunkt, mer hensiktsmessig enn hva tilfellet er med den ordningen vi har i dag.»
Ingen uttalte seg om dette. Departementet legg etter dette til grunn at Kulturministeren i staden for dei årlege meldingane munnleg bør gjere greie for aktuelle mediepolitiske spørsmål for Stortinget. Dette bør skje i vårsesjonen dersom det er praktisk mogleg.
I samsvar med komiteens ønskjemål kjem departementet attende til fleire spørsmål i eigne saker. Dette gjeld m.a.
Spørsmålet om forbod mot reklame for politiske parti og livssyn.
Endringar i kringkastingslova som følgje av endringar i EØS-avtalens fjernsynsdirektiv.
Endringar i regelverket om sponsing av kringkastingsprogram.
Spørsmålet om kva for rammer som skal gjelde for Norsk rikskringkastings kommersielle verksemd.
Digitalt fjernsyn.