1 Formål og hovudoversikt

1.1 Formål

Forsvarsdepartementet legg i denne proposisjonen fram forslag om visse endringar i løyvingar i forsvarsbudsjettet for 1999. Formålet er å skape samsvar mellom løyvingane under dei einskilde kapittel og postar og dei endringane i budsjettføresetnader som har skjedd sidan forsvarsbudsjettet for 1998 vart utarbeidd.

Saker Stortinget bør informerast særskilt om vert omtala under del I Formål og hovudoversikt og bak under del III Spesielle saker. Endringane på kapittel/post kjem fram under vedtaksdelen i denne proposisjonen.

1.2 Forhold som endrar ramma for 1999-budsjettet

1.2.1 Nedtrekk grunna meirforbruk i 1998

Avslutninga av rekneskapen for 1998 synte eit meirforbruk under kap 1760, post 48, kap 1710, post 01 og kap 1795, post 01 på totalt 120,007 mill. kroner, eller høvesvis 110,354 mill. kroner, 8,672 mill. kroner og 0,981 mill. kroner. Desse midla vil verte dekte ved at ramma for 1999 vert foreslått redusert tilsvarande, fordelt på kapitla som stod for overskridingane.

1.2.2 Netto meirinntekter i 1999

I forhold til inntekter løyvde i Blå bok 1999 vert det ei netto meirinntekt (brutto meirinntekter minus mindreinntekter) på 107,057 mill. kroner. Desse inntektene vert foreslått tillagt ramma for 1999 under tilvising til vedtakspost IV i St. prp. nr. 1 (1998-99) som gir Forsvaret ein generell meirinntektsfullmakt for alle inntekter under Forsvarsdepartementet, unnateke militære bøter og inntekter frå refusjoner i samband med Internasjonale fredsoperasjonar. Meirinntekt grunna refusjonar frå FN utgjer 60,092 mill. kroner. Dette er refusjonar i samband med operasjonar frå tida før unntaket om inntekter i samband med Internasjonale operasjonar, vart lagt inn i meirinntektsfullmakta omtala ovanfor. Brutto meirinntekt 1999 utgjer samla 229,867 mill. kroner, jf. spesifikasjon i pkt 2.2. Brutto mindreutgift utgjer samla 122,810 mill. kroner med følgande fordeling:

Kap 4760, post 48 Fellesfinansierte byggje- og anleggsarbeid er redusert med 105 mill. kroner grunna lavare refusjonar frå NATO enn venta, kap 1760, post 48 er tilsvarande redusert. Kap 4725, post 15 Refusjon frå lærlingeordninga er redusert med 14 mill. kroner, kap 1725, post 01 Driftsutgifter er tilsvarande redusert. Kap 4719, postane 70 Renter låneordning og 90 Lån til bustadformål, er til saman reduserte med 3,310 mill. kroner grunna lavt rentenivå og lavare innløysing av lån enn forventa.

1.2.3 Tilleggsløyving i 1999

Finansiering av Kosovo-styrka (KFOR)

Etter at luftoperasjonane mot Den føderale republikken Jugoslavia (FRJ) vart fullført i juni, vart det ved FN-sikkerhetsrådsresolusjon 1244 gjeve mandat til ein internasjonal styrke, Kosovo Force (KFOR), for å skapa trygge omgjevnader i Kosovo. Når det gjeld norsk deltaking i KFOR I, er Telemark bataljon (TMBN) initielt forsterka med eit ingeniørkompani, totalt 1,292 personell deployert til Kosovo, der operativ kommando vart overteke 12. oktober. I tillegg til TMBN deltar Noreg med informasjonsoffiserer, sambandselement og stabsoffiserar i hovudkvarter. Det norske bidraget inngår i den britisk leia brigaden i det sentrale Kosovo, der også Finland, Sverige og Canada stiller styrkebidrag.

Utgiftene i samanheng med å deployera nemnde einingar er for 1999 venta å vera 880 mill. kroner, som er foreslått tilleggsløyvde.

1.2.4 Midlar ført attende til statskassen

Det er for 1999 foreslått å føra tilbake til statskassen 163,035 mill. kroner i samanheng med mindreutgifter på kap 1792 Norske styrker i utlandet. Mindreutgifta kjem som følgje av at vårt styrkebidrag til SFOR (vår internasjonale styrke i Bosnia) er vesentleg redusert etter at KFOR (Kosovo) vart oppretta. Netto mindrebehov er 202,535 mill. kroner. Frå dette beløpet er det foreslått løyvd 38 mill. kroner til kjøp av SISU (pansra personellkjøretøy) og 1,5 mill. kroner til dekking av stabsoffiser i Øst-Timor.

1.3 Det økonomiske grunnlaget for omgrupperingsproposisjonen

1.3.1 Økonomisk grunnlag

Grunnlaget for omgrupperingane er vedteke budsjett (Blå bok) for 1999 og seinare løyvingsendringar som Stortinget har vedteke, fullmakter gitt av Stortinget til Finansdepartementet som ikkje kjem fram som løyvingsendring under dei einskilde departementa og midlar ført over frå 1998. Det er og teke omsyn til Forsvarets del av lønskompensasjon for 1999, 54,5 mill. kroner.

I 1999 er det for Forsvarsbudsjettet sett i verk faktiske løyvingsendringar ved følgjande:

• St. prp. nr. 62 (1998-99), jf. Innst. S. nr. 161 «Forsvarets bidrag ifm krisen i Kosovo» medført å auka utgiftsramma med 305 mill. kroner.

• St. prp. nr. 67 (1998-99), jf. Innst. S. nr. 236 (1998-99), «Omprioriteringer og tilleggsbevilgninger på Statsbudsjettet 1999» medførte å auke utgiftsramma med 682 mill. kroner og inntektsramma med 3,2 mill. kroner.

• St. prp. nr. 87 (1998-99), jf. Innst. S. nr. 223 (1998-99), «Om endringer i regulativ for tillegg mv til utskrevne vernepliktige mannskaper» medførte ein rammeauke på 10,566 mill. kroner.

Departementet foreslår på denne bakgrunn, under forslag til vedtak, at løyvingane vert endra med ein auke på 704,015 mill. kroner på utgiftsramma og ein auke på 107,057 mill. kroner på inntektsramma.

1.3.2 Utgifter

1.3.3 Inntekter

Tala i tabellane ovanfor syner netto endringar på dei ulike postane. Utgiftstabellen er inklusiv fordeling av netto meirinntekter.