Erklæring frå formannskapen på vegner av Den europeiske unionen om Kenya (01.10.09)

EU konstaterer med uro at den kenyanske regjeringa ikkje har klart, innanfor den fastsette tidsramma, å opprette ein lokal spesialdomstol som er truverdig, uavhengig og konstitusjonelt beskytta, og som kan få slutt på straffridomen for dei ansvarlege for valden etter valet.

EU oppmodar Kenya om å vedta tiltak snarast råd for å få slutt på straffridomen og kjempe mot korrupsjon. EU oppmodar òg dei kenyanske styresmaktene om å samarbeide fullt ut og effektivt med den internasjonale straffedomstolen.

Den europeiske unionen vil halde fram med å følgje nøye med på det som skjer i Kenya, og vil vurdere korleis ein kan få fortgang i reformene i nært samarbeid med andre internasjonale samarbeidspartnarar.

EU understrekar på nytt standpunktet sitt frå 27. juli 2009 og oppmodar dei politiske leiarane i Kenya om å ta del i og forplikte seg til ei fullstendig gjennomføring av reformene, slik det er fastsett i lova om nasjonal einskap og forsoning (2008) som vart mekla fram av AU-panelet av framståande afrikanske personar under leiing av Kofi Annan. Her vert dei kenyanske styresmaktene oppmoda på det sterkaste om å vise full respekt for menneskerettane.

EU stadfestar på nytt at unionen vil støtte reformprosessen, som er svært viktig for forsoning, nasjonsbygging, utvikling og førebygging av konfliktar i framtida i Kenya.

Søkjarlanda Kroatia* og Den tidlegare jugoslaviske republikken Makedonia*, dei potensielle søkjarlanda Albania, Bosnia-Hercegovina og Montenegro, som er med i stabiliserings- og assosieringsprosessen, EFTA-landa Island, Liechtenstein og Noreg, som er medlemer av Det europeiske økonomiske samarbeidsområdet, Ukraina, Republikken Moldova, Armenia og Georgia sluttar seg til denne erklæringa.

* Kroatia og Den tidlegare jugoslaviske republikken Makedonia er framleis med i stabiliserings- og assosieringsprosessen.

Les erklæringa på nettsida til EU (PDF).