BarentsWatch

BarentsWatch skal vere eit heilskapleg overvakings- og informasjonssystem, som skal støtte opp under det ansvaret Noreg har i dei nordlege havområda.

Forvaltningsansvaret i norske kyst- og havområde er fordelte mellom fleire etatar. BarentsWatch skal byggje på den omfattande kunnskapen som allereie eksisterer, og bidra til betre informasjonsutveksling mellom etatar.

BarentsWatch samlar og gjer tilgjengeleg relevant informasjon for sjøfarande, havforskarar og andre som har interesse for, eller er brukarar av, hav- og kystområda frå Barentshavet til Skagerrak. Døme på informasjonstenester er hamneoversikter, vêr- og isvarslar og karttenester (som kart over havstraumar, levande marine ressursar, petroleumsaktivitet og dessutan moglegheiter for å kombinere ulike kartlag).

Gjennom dette systemet skal ulike etatar (som Forsvaret, Kystverket, Hovudredningssentralen m.fl) kunne utveksle informasjon om skipstrafikk og anna på ein sikker og effektiv måte. Målet for samhandlingsystemet er å gi etatane tilgang til eit felles, evaluert situasjonsbilete. Dette kan gi ei forbetra operasjonsleiing på tvers av ansvarsområde. Eit samhandlingsystem kan vere viktig i ein beredskapssamanheng, m.a. i søk- og redningsaksjonar, oljevernsaksjonar og i arbeidet mot ulovleg fiske.

• BarentsWatch.no