Satsing på entreprenørskap i skolen
Historisk arkiv
Publisert under: Regjeringen Stoltenberg I
Utgjevar: Kommunal- og regionaldepartementet
Pressemelding | Dato: 11.10.2001 | Sist oppdatert: 23.10.2006
Regjeringa vil satse sterkare på entreprenørskap i utdanningssystemet. Den forsterka innsatsen skal rettast mot grunnskolen, den vidaregåande skolen og dei statlege høgskolane.
Pressemelding
Nr.: 159/2001
Dato: 11.10.2001
Statsbudsjettet 2002
Satsing på entreprenørskap i skolen
Regjeringa vil satse sterkare på entreprenørskap i utdanningssystemet. Den forsterka innsatsen skal rettast mot grunnskolen, den vidaregåande skolen og dei statlege høgskolane.
Den sterke satsinga på slikt entreprenørskap er ei direkte oppfølging av stortingsmeldinga om distrikts- og regionalpolitikken. Her strekar Regjeringa under at arbeidet med å utvikle heilskaplege strategiar for entreprenørskap i utdanningssystemet skal førast vidare.
Gjennom ei slik satsing i utdanningssystemet ønskjer Regjeringa å vere med på å gi ungdom frå ungdomsskole til høgskole positive haldningar til entreprenørskap og den dugleiken som trengst for å lykkast. Det skal leggjast meir vekt på korleis kvar enkelt skole og høgskole kan setje entreprenørskap på saklista gjennom ulike tiltak. Målet med satsinga er å gi ungdom og høgskolekandidatar innsikt i vilkåra nærings- og bedriftslivet arbeider under, knyte næringslivet og skolen nærmare saman og gi skole og høgskole høve til å fremje entreprenørskap i undervisninga.
- Dersom vi motiverer mange unge menneske til å starte eiga verksemd, kan det medverke til at fleire nye bedrifter blir etablerte etter kvart – bedrifter som kan erstatte jobbar/bedrifter som naturleg fell bort. Dette medverkar til høgare innovasjonstakt og til å halde oppe verdiskaping og lønnsemd i alle delar av landet, seier kommunal- og regionalminister Sylvia Brustad.
Gjennom programmet SMB-HØGSKOLE vil Regjeringa auke den høgskoleretta innsatsen. Det er Noregs forskingsråd som forvaltar dette programmet.