Løyvinga til Arkivverket blir i budsjettframlegget for 2005 foreslått auka med 15,8 millionar kroner til i alt 179,7 millionar kroner.

Auken skal i hovudsak dekkja utgifter i samband med ombygging, utviding og innreiing av riksarkivbygningen i Oslo.

Etter utvidinga vil riksarkivbygningen mellom anna få fleire kontorarbeidsplassar, møte- og undervisningsrom, utstillingsareal og betre publikumsfasilitetar. Dette vil gi Riksarkivet og Statsarkivet i Oslo nødvendig armslag til å kunna imøtekomma dei krava som må stillast til ein moderne, publikumsretta kultur- og forvaltningsinstitusjon. Utbygginga legg elles til rette for å gjennomføra ein planlagd kapasitetsvekst i Arkivverket i åra framover. Dette er nødvendig for å handtera dei store utfordringane med å ta vare på elektronisk arkivmateriale for ettertida.

Ein mindre del av auken, 0,7 millionar kroner, skal gå til forvaltninga av Samisk Arkiv som etter ønske frå Sametinget, er foreslått overført frå Sametinget til Riksarkivaren frå 2005.