Regjeringa styrkjer arbeidet mot rømming av oppdrettsfisk

– Rømming er framleis ei av dei store utfordringane innan norsk havbruk, og det er nødvendig med arbeid på mange frontar for å få rømmingstala ned, seier fiskeri- og kystminister Helga Pedersen. I budsjettforslaget går regjeringa inn for å styrkje innsatsen mot rømming, medrekna den nye rømmingskommisjonen. Det er også forslag om å styrkje løyvinga til oppfølging og evaluering av nasjonale laksefjordar og laksevassdrag.

Fiskeridirektoratet la i 2006 fram ein tiltaksplan mot rømming – ”Visjon nullflukt”. Viktige element i tiltaksplanen er betre forvaltingsverkty og meir målretta og risikobasert kontrollinnsats.

Sommaren 2006 oppnemnde Fiskeri- og kystdepartementet ein fast kommisjon for rømming av oppdrettsfisk. Kommisjonen skal innhente informasjon og gjere undersøkingar med sikte på å finne årsaka til alvorlege rømmingar og anleggshavari. Kommisjonen skal også arbeide systematisk for å redusere risiko for rømmingar og havari ved informasjon og fremme nødvendige forslag til endringar i regelverk, standardar med meir.

Regjeringa foreslår i budsjettforslaget å styrkje Fiskeridirektoratet sitt budsjett med 2 millionar kroner til oppfølging av arbeidet mot rømming.

Fiskeri- og kystdepartementet har i samarbeid med Miljøverndepartementet etablert eit nasjonalt overvakings- og evalueringsprogram for å følgje opp ordninga med nasjonale laksevassdrag og laksefjordar. Havforskingsinstituttet vil få eit spesielt ansvar for å overvake rømmingssituasjonen og for å skaffe tilstrekkeleg kunnskap om effektane av tiltak mot rømmingar. Mengde og vandring av rømt oppdrettsfisk i ulike sonar vil også bli kartlagt for å utvikle funksjonelle overvakingsrutinar.

Det er forslag om å auke Havforskingsinstituttet sitt budsjett med 2 millionar kroner til oppfølging av dette.

Les også: Fiskeridirektoratets tiltaksplan mot rømt oppdrettsfisk «Visjon nullflukt»

Budsjett 2007

•  Fiskeri- og kystdepartementets fagproposisjon
  (også i utskriftsvennlig versjon – PDF-format)
• Oversiktsside over alle budsjettdokumenter

Andre pressemeldinger fra Fiskeri- og kystdepartementet:

• Marin verdiskaping langs hele kysten
• Nytt marint verdiskapingsprogram
• Økt innsats mot ulovlig, uregulert og urapportert fiske
• Ytterligere styrking av dokumentasjon av fremmedstoffer i sjømat
• Norsk-indisk samarbeid om forskning på dyre- og fiskevaksiner
• Kommunale hamner – omlegging av meirverdiavgift