Beavdegirji – Davviriikkalaš oktasaščoahkkin – 05.04.00

Sámi áššiid ministtarčoahkkin dollojuvvui Oslos 5.4.2000, ja dasa oassálaste Suoma justisministtar Johannes Koskinen, Ruoŧa eanadoalloministtar Margareta Winberg ja Norgga gieldaministtar Sylvia Brustad.

1. Ministarat, geain lea ovddasvástádus iežaset riikkaid sámi áššiin, mearridedje ásahit eahpeformála oktasašbarggu čanastuvvon Davviriikkaid Ministtarráđđái ja doallat jeavddalaš čoahkkimiid daid sámi áššiid diehtojuohkima, ráđđádallama ja meannudeami hárrái, main leat oktasaš davviriikkalaš beroštumit. Ministarat mearridedje maid bovdet Suoma, Ruoŧa ja Norgga sámedikkiid presideanttaid jeavddalaš diehtojuohkin- ja ráđđádallan čoahkkimiidda áššiin, main leat oktasaš beroštumit.

2. Ministarat mearridedje bovdet vuosttaš oktasaš čoahkkimii, masa oassálastet sámediggepresideanttat, čakčat 2000; dán oktavuođas ráđđádallat ovttasbargovugiin, davviriikkalaš sámi konvenšuvnnas ja vejolaš eará dieđihuvvon áššiin.

3. Ministarat mearridedje, ahte ministtarčoahkkimiid gohččuma ja daid jođiheami ovddasvástádus lea vurrolagaid iešguđet ministaris. Iešguđet stáhta sámi ja boazodoalloáššiid Davviriikkalaš ovttasbargoorgána sáttagoddi galgá fuolahit ministtarčoahkkimiid, ja ministariid ja sámediggepresideanttaid oktasaščoahkkimiid čállindoaimmain. Ovttasbargoorgána galgá juohkit dieđuid Davviriikkaid Ministtarráđi čállingoddái áššiin, mat gieđahallojuvvojit čoahkkimiin.

4.Sámi ja boazodoalloáššiid Davviriikkalaš ovttasbargoorgána njuolggadusat galget rievdaduvvot nu, ahte ođđa ovttasbargovuogit váldojuvvojit vuhtii, ja nu ahte maiddái ovttasbargoorgána, sámedikkiid ja Davviriikkaid Ministtarráđi čállingotti gaskasaš ovttasbargu virgeolbmuid dásis váldojuvvo vuhtii.

5. Ministarat mearridedje, ahte bargojoavkku čielggadanrapporta “Davviriikkalaš sámekonvenšuvnna dárbu ja vuođđu” sáddejuvvo gulaskuddamii departemeanttaide ja guoskevaš almmolaš eiseválddiide, ja maiddái Suoma, Norgga ja Ruoŧa sámedikkiide. Gulaskuddanorgánaid berre maiddái ávžžuhit evttohit áigeguovdilis oktasašbargofáttáid, mat sáhttet leat áigeguovdilat boahttevaš konvenšuvdnabarggu hárrái.

6. Ministarat mearridedje, ahte oassálasti stáhtat mákset iežaset goluid, mat bohtet konvenšuvdnaášši čuovvulanbarggus. Jus šattaš dárbbašlažžan oktasaš čállin- dahje čielggadanveahki bálkáheapmi, ruhtaduvvo dat sierra šiehtadusa vuođul.


Oslo, cuoŋománu 5.b. 2000.

Sylvia Brustad

Margareta Winberg

Johannes Koskinen