Beavdegirji – Davviriikkalaš oktasaščoahkkin – 07.11.01

Čoahkkin gaskal sámi gažaldagaid ovddasvástideaddji ministariid ja sámediggepresideanttaid, Stockholmmas, skábmamánu 7.b. 2001

1 Sámi gažaldagaid davviriikkalaš ámmátolbmoorgána njuolggadusat

Ministarat ja sámediggepresideanttat leat ovttaoaivilis ahte ođđa namma oktasaš hálddatlaš orgánas lea Sámi gažaldagaid davviriikkalaš ámmátolbmoorgána. Ministarat ja sámediggepresideanttat leat maid ovttaoaivilis ahte Sámi gažaldagaid davviriikkalaš ámmátolbmoorgána njuolggadusat galget leat nu go ovdanboahtá mielddus 1:s.

2 Davviriikkalaš sámekonvenšuvdna

Ministarat ja sámediggepresideanttat leat ovttaoaivilis ahte galgá nammadit áššedovdijoavkku mii galgá ráhkadit teakstaevttohusa davviriikkalaš sámekonvenšuvdnii. Áššedovdijoavku galgá álggahit barggu ovdal geassemánu 1.b. 2002:s ja dan bargun galgá leat nu go ovdanboahtá mielddus 2:s.

3 Ruoŧas ja Suomas dohkkehit Sámi allaskuvlla oahpaheaddjeoahpu Guovdageainnus

Ministarat ja sámediggepresideanttat oidnet ahte Ruoŧa ja Suoma našuvnnalaš láhkavuođđudus dohkkeha su gelbbolažžan gii lea čađahan oahpaheaddjeoahpu Sámi allaskuvllas Guovdageainnus virgáibiddjot oahpaheaddjin nai Ruoŧas ja Suomas.  Gelbbolasvuođagažaldat ii gáibit dasto eará doaimmat.

4 Ruđalaš doarjja Sámi parlamenttáralaš ráđđái

Ministarat ja sámediggepresideanttat leat ovttaoaivilis ahte reivves Davviriikkalaš ráđđái ja Davviriikkalaš ministtarráđđái váldit ovdan Sámi parlamenttáralaš ráđi ruhtadárbbu, mielddus 3.

5 Alit sámi dáiddaoahppu

Ministarat ja sámediggepresideanttat leat ovttaoaivilis ahte Sámi gažaldagaid davviriikkalaš ámmátolbmoorgána galgá joatkit veardidit dárbbaša go eanet guorahallat alit sámi dáiddaoahpu.

6 Sámegiel doarjja dihtorgeavaheamis

Ministarat ja sámediggepresideanttat leat ovttaoaivilis dáhttut Sámi gažaldagaid davviriikkalaš ámmátolbmoorgána čielggadit vejolašvuođaid ráhkadit oktasaš davviriikkalaš čovdosa mainna čoavdit sámegiel doarjaga dihtorgeavaheamis ja dahkat álgaga oažžut čađahuvvot dakkár standárdda.

 

Stockholmmas, skábmamánu 7.b. 2001

Margareta Winberg

Johannes Koskinen

Erna Solberg

Per Mikael Utsi

Pekka Aikio

Sven  Roald Nystø