Beavdegirji – Davviriikkalaš oktasaščoahkkin – 18.10.06

Suoma, Norgga ja Ruoŧa sámiáššiid ovddasvástideaddji ministariid ja sámediggepresideanttaid čoahkkin Oslos golggotmánu 18. beaivvi 2006

1 Davviriikkalaš sámi giellabálkkášupmi – Gollegiella 2006

Sámeministarat ja sámediggepresideanttat dorjot árvvoštallanlávdegotti evttohusa ja ákkastallama dán jagi Davviriikkalaš sámi giellabálkkášumi – Gollegiella 2006 – dáfus. Dán jagi vuoitit leaba Jouni Moshnikoff Čeavetjávrris Suomas bealde ja Harald Gaski Romssas Norgga bealde.

Sámi gažaldagaid Davviriikkalaš virgeolmmošorgána bivdojuvvo ráhkkanahttit boahtte giellabálkkášumi geigejumi jagis 2008, dásá gullá árvvoštallat vejolaš rievdadeami giellabálkkašumi njuolggadusaide ja árvvoštallanlávdegoddái nammadit lahttuid boahtte áigodahkii.

2 Davviriikkalaš sámekonvenšuvdna – gulaskuddan ja viidáset bargu

Sámeministarat ja sámediggepresideanttat oidnet ahte davviriikkalaš sámekonvenšuvnna evttohus lea leamaš viiddis gulaskuddamis Suomas, Ruoŧas ja Norggas.

Ministarat ja presieanttat leat ovttaoaivilis viidáseappot doaimmahit barggu davviriikkalaš sámekonvenšuvnnain, vuosttažettiin sisriikkalaččat gulaskuddancealkámušaid čuovvolemiin ja vejolaš váikkuhusiskkademiiguin. Guđetguimmiide raporteren, dieđuid juogadeapmi ja oktiiheiveheapmi doaimmahuvvo sámeministariid ja sámediggepresideanttaid davviriikkalaš ovttasbarggu olis sámi gažaldagaid birra.

Ministariid ja presideanttaid mihttomearri lea ahte riikkat leat čielggadan iežaset posišuvnnaid boahtte oktasaščoahkkima rádjái, mii lea 2007 čavčča.

3 Oktavuohta ja gulahallan  Ruošša eiseválddiiguin ja sápmelaččaiguin

Sámeministarat ja sámediggepresideanttat  oaivvildit ahte lea deaŧalaš nannet sápmelaččaid ja Bárentsguovllu eará álgoálbmogiid stáhtusa.

Ministarat ja presideanttat leat duhtavaččat dainna go Bárentsráđđi (Barents Euro-Arctic Council), Árktalaš Ráđđi ja Davviriikkalaš Ministtarráđđi leat váldán álgoálbmotgažaldagaid iežaset prográmmii, ja go sii iešguđet ovttasbargo-oktavuođain dássedit gulahallet Ruošša eiseválddiiguin ja sápmelaččaiguin áššiin main leat oktasaš beroštumit. Sii ávžžuhuvvojit vel eanet fuola atnit álgoálbmogiid dilálašvuođain ja doarjut doaimmaid mat leat mielde sihkkarastime sin birgejumi, giela ja kultuvrra.

Oaidnit buriin mielain ahte lea ásahuvvon ráđđi Murmánskka oblasttii mii galgá ovttastit ja rávvet gažaldagain ja áššiin main lea mearkkašupmi Guoládaga sápmelaččaide.

Sámi gažaldagaid Davviriikkalaš virgeolmmošorgána bivdojuvvo áigges áigái árvvoštallat lea go dárbu vel eanet gulahallat Ruošša eiseválddiiguin ja sápmelaččaiguin dihto ja erenoamáš mearkkašahtti áššiin.

4 Davviriikkalaš boazodoalloovttasbargu

Sámeministarat ja sámediggepresideanttat bivdet Sámi gažaldagaid Davviriikkalaš virgeolmmošorgána doaimmahit ahte lágiduvvo konferánsa Norgga, Ruoŧa ja Suoma eiseválddiid ja boazodoalloealáhusa várás. Ulbmilin konferánssain lea nannet oktavuođa ja mearridit vejolaš ovttasbargosurggiid mat leat ávkin buot golmma rikka boazodoalloealáhussii.

         

Oslo, golggotmánu 18. beáivi 2006

Bjarne Håkon Hanssen Bargo- ja searvadahttinministtar   
Norga

Leena Luhtanen
Justiisaministtar
ovddas Peter Stenlund
Ambassadevra
Suopma

Eskil Erlandsson Eanandoalloministtar
Ruoŧŧa


Aili Keskitalo   
Sámediggepresideanta
Norga

 


Pekka Aikio
Sámediggepresideanta
Suopma


Lars Anders Baer
Sámedikki stivrraságadoalli
Ruoŧŧa