Ovddasvástádusa juohkin mánáidsuodjalusas

Sihke gielddain ja stáhtas leat doaimmat ja ovddasvástádus mánáidsuodjalansuorggis. Buot gielddain galgá leat mánáidsuodjalusbálvalus.

Mánáidsuodjalanbálvalus galgá earret eará addit rávvagiid ja bagadallama, čađahit guorahallamiid, álggahit ja čuovvolit áššiid dahje ráhkkanahttit áššiid fylkkanammagotti meannudeapmái.

Stáhta ovddasvástádus mánáidsuodjalussii lea juhkkojuvvon Mánáid- dásseárvo- ja searvadahttindepartemeantta, Mánáid-, nuoraid ja bearašossodaga ja Mánáidsuodjalusa ja sosiála áššiid fylkkanammagotti gaskka.

Mánáid-, dásseárvo- ja searvadahttindepartemeanttas lea hálddašanovddasvástádus mánáidsuodjaluslága vuođul ja goziha ahte lágat ja muđui eará mearrádusat geavahuvvojit riekta. Departemeanta guorahallá maid movt láhka doaibmá ja čađaha rievdadusaid dárbbu mielde. Departemeantta ovddasvástádussii gullá maid mearridit njuolggadusaid ja instruvssaid, álggahit dutkamiid suorggis, ovddidit oppalaš mánáidsuodjaluspolitihka ja láhčit dili vai lea álki gávdnat dieđuid mánáidsuodjalusa birra.

Mánáid-, dásseárvo- ja searvadahttindepartemeanta ii doaimma ovttaskas áššiid váiddaásahussan.

Mánáid-, nuoraid- ja bearašossodat (Mnbossodat)
Das leat vihtta guovlulaš mánáidsuodjaluseiseváldi ja guovddáš mánáidsuodjaluseiseváldi - Mnbdir (Mánáid-, nuoraid- ja bearašdirektoráhtta). (

Guovlulaš mánáidsuodjaluseiseválddit galget veahkehit gielddaid mánáidsuodjalusbálvalusa go máná ferte sirdit eret ruovttus, veahkehit gielddaid háhkat ja gaskkustit biebmoruovttuid ja dat galgá maid ovddasvástidit ahte biebmoruovttut ožžot oahpu ja bagadallama. Ossodaga ovddasvástádus lea maid ásahit ja jođihit ásahusaid ja dohkkehit priváhta ja gielddalaš ásahusaid mat geavahuvvojit mánáidsuodjaluslága mielde.   

Stáhtahálddašeaddji
bearráigeahččá mánáidsuodjalusdoaimmaid gielddas. Dat mearkkaša ahte Stáhtahálddašeaddji fuolaha ahte gielddat čađahit bargguid mánáidsuodjaluslága mielde ja fuolaha ahte gielddat ožžot ráđiid ja bagadallamiid. Stáhtahálddašeaddji bearráigeahččá maid mánáidsuodjalusásahusaid.

Stáhta Dearvvašvuođabearráigeahčču
Das lea bajimuš fágalaš ovddasvástádus bearráigeahččandoaimmaid ektui maid Fylkkamánni čađaha mánáidsuodjalussuorggis.

Mánáidsuodjalusa ja sosiála áššiid fylkkanammagoddi.
Dat lea duopmostuolloláhkásaš hálddašanorgána mas lea mearridanváldi earret eará fuolaváldináššiin ja dakkár áššiin go bákkus šaddá dárbu meannudit áššiid mat gusket nuoraide geain leat duođalaš láhttenváttisvuođat.  Riikkas leat guoktenuppelohkái nammagotti. Áššiid meannudettiin leat nammagottis jođiheaddji gii lea jurista, guokte áššedovdi ja guokte miellahtu dábálaš lávdegottis. Mearrádusaid maid fylkkanammagoddi mearrida sáhttá ovddidit diggeriektái.

Ovddasvástádusa juohkin gielddalaš ja stáhtalaš mánáidsuodjaluseiseválddiid gaskka

Bargguid- ja ovddasvástádusa juohkin gielddalaš ja stáhtalaš mánáidsuodjaluseiseválddiid gaskka – nugo mánáidsuodjalusa máksinortnegat, gávdnojit johtočállosis Q-06/2007. Johtočálus lea almmuhuvvon dušše elektronalaččat.