Mánáidsuodjalusa doaimmat olggobealde ruovttu

Eanaš bearrašat geat váldet oktavuođa mánáidsuodjalusbálvalusain dárbbašit dušše veahkkedoaimmaid ruovttus. Máná fárrehit eret ruovttus lea áigeguovdil dušše jos doaibmabijut ruovttus eai sihkkaraste mánnái doarvái buori fuolahusdili.

Máná sáhttá bidjat eret ruovttus ovttas dahje vejolaččat  váhnemiid ja máná dáhtu  vuostá.  Eanaš mánát geat váldojuvvojit eret ruovttus sirdojuvvojit biebmoruovttuide, ja muhtumat fas mánáidsuodjalusásahusaide.

Eaktodáhtolaččat fárrehit máná eret ruovttus

Jos mánná eaktodáhtolaččat fárrehuvvo eret ruovttus, de mearriduvvo dat § 4-4 viđát lađđasa vuođul. Dákkár mearrádus galgá dušše dalle dahkkot jos váhnemat oanehit áigái eai sáhte beaivválaččat fuolahit máná dohkálaččat.  Dákkár oktavuođain sáhttá mánáidsuodjalusbálvalus lágidit máná biebmoruktui dahje mánáidsuodjalusásahussii.

Eanet dieđuid gávnnat departemeantta njuolggadusain mearriduvvon juovlamánu 10.b.1998 Njuolggadusat juovlamánu 10.b. 1998 – Veahkkedoaimmat – mánáidsuodjalusláhka § 4-4

Fuolaváldin

Fuolaváldin dahje máná sirdit eret ruovttus lea dárbbašlaš dušše dalle jos máná ruovttudilálašvuohta lea heittot, ja jos dan ii sáhte buoridit dábálaš veahkkedoaimmaiguin. Mánáidsuodjaluslága vuolggasadji lea ahte mánát galget šaddat bajás biologalaš váhnemiid luhtte, ja danne lea fuolaváldinsirdimii biddjojuvvon garra  eavttut. Fuolaváldin mearrádus  sáhttá dahkkojuvvot jos beaivválaš fuolahusas maid mánná oažžu, leat duođalaš váilevuođat dahje jos mánná illástuvvo dahje gillá eará duođalaš veahkaválddálašvuođa ruovttus.    

Váldi lágidit mánnái eará orrunsaji lea dušše fylkkanammagottis. Gielddaid mánáidsuodjalusbálvalus galgá guorahallat ja gárvvistit ášši. Go fylkkanammagoddi  meannuda ášši, de  galgá álo árvvoštallat gažaldagaid mat gusket máná ja váhnemiid ovttastallamii. Maŋŋil go máná fuolaváldin mearrádus lea dahkkon, de sáhttá máná lágidit biebmoruktui dahje muhtun ásahussii.  

Gaskaboddosaš mearrádusat fáhkkadiliin

Dábálaččat mearrida fylkkanammagoddi sirdit máná eret ruovttus almmá váhnemiid mieđáhusa haga. Muhtumin ferte dahkat johtilis mearrádusa, ja dalle sáhttá mánáidsuodjalus dahje áššáskuhttineiseváldi dahkat nu gohčoduvvon dallánaga mearrádusa. Heahtedilis dákkár mearrádus sihkkarastá ahte mánnái lágiduvvo orrun eará sadjái go ruovttus.  Eanet dieđuid gávnnat departemeantta njuolggadusat mearriduvvon golggotmánu 15.beaivvi 1998 gaskaáigásaš ja gaskaboddosaš mearrádusaid birra heahtediliin