Doaimmashedjoneamit
Artihkal | Maŋimuš ođasmahttojuvvon: 22.03.2024 | Kultur- ja dásseárvodepartemeanta
Olbmuin geain leat doaimmashedjoneamit leat seamma rievttit go earáin. Ráđđehus dáhttu ahte olbmot galget sáhttit eallit friddja eallimiid, beroškeahttá doaimmashehttejumiin. Ráđđehus áigu ovddidit olmmošvuoigatvuođaid ja nu maiddái dásseárvvu, mielváikkuheami ja ja ovttaskas olbmo friddja válljejumi árvvusatnima. Ráđđehus áigu loahpahit vealaheami, eahpefriddjavuođa ja vearrivuođa.
ON-konvenšuvdna vuoigatvuođaid birra olbmuide geain leat hedjonan doaibmannávccat (CRPD) lea vuođđun ráđđehusa politihkkii. Buot olbmot sáhttet oažžut doaimmashedjonemiid, ja doaimmashedjoneamit leat lunddolaš oassi olmmošlaš máŋggabealatvuođas. Politihkka olbmuide geain leat doaimmashedjoneamit guoská buot servodatsurggiide, ja vuoigatvuođat suodjaluvvojit surggiid rastá.
Kultur- ja dásseárvodepartemeanttas lea bajit ovddasvástádus koordineret ráđđehusa politihka olbmuide geain leat hedjonan doaibmanávccat eará departemeanttaid ektui. Sektordepartemeanttain lea ovddasvástádus iežaset surggiin. Organisašuvnnat leat dehálaš gulaskuddanbealit relevánta politihkalaš proseassain, nu go doaibmaplánaid ja strategiijaid hábmemis.
Dasa lassin bovde stáhtaráđđi jahkásaš politihkalaš smávvakonferánssaide organisašuvnnaiguin Funksjonshemmedes Fellesorganisasjon (FFO), Samarbeidsforumet av funksjonshemmedes organisasjoner (SAFO) ja Unge funksjonshemmede ja eará stáhtaráđiiguinsuorggis áigeguovdilis fáttáid birra. Daid konferánssažiin čielggada stáhtaráđđi suorggi politihkalaččat. Dat golbma organisašuvnna ovttasbarget maiddái Bufdir:in, departemeantta ovddas, čalmmustahttit riikkaidgaskasaš beaivvi olbmuid váras geain leat doaimmashedjoneamit, juohke jagi juovlamánu 3. beaivvi.
Ráđđehus galgá doaimmahit offensiiva dásseárvopolitihka mii dahká ahte buohkat fátmmastuvvojit servodahkii, beroškeahttá sohkabealis, seksuála oidimis, doaibmanávccain ja čearddalašvuođas. Našuvnnalaš dásseárvo- ja vealahanláhkaásahusat leat dásseárvodepartemeantta ovddasvástádus, mat earret eará gildet vealaheami doaimmashedjoneami dihte.
Mánáid-, nuoraid- ja bearašdirektoráhta (Bufdir) lea fágadirektoráhta
Bufdir lea departemeantta fágadirektoráhta dan politihkas mii guoská olbmuide geain lea doaimmashehttejupmi. Direktoráhtas lea sierra diehtojuohkinsiidu doaimmashehttejuvvon olbmuid dásseárvvu birra. Bufdir bargá buoridit doaimmashehttejuvvon olbmuid eallineavttuid ja eallindili.
Bufdir bargguide gullet earret eará:
- Iešguđetlágan doarjagat doaimmaide olbmuid várás geain lea doaimmashehttejupmi. Buot stáhtadoarjagiid eaktodáhtolaččaide gávnnat dáppe: https://tilskudd.dfo.no/.
- Dokumentašuvdna doaimmashehttejuvvon olbmo dili birra sierra loguiguin ja statistihkain (Bufdir.no).
- Prográmma mii galgá loktet gelbbolašvuođa suohkaniin doaimmashehttejuvvon olbmuid vuoigatvuođaid ON-konvenšuvnna birra (CRPD)
- Eará gáldu dieđuide olbmuid birra geain leat doaimmashehttejumit lea prográmma TryggEst