Guhkes áiggi plánen politihkas

Dutkama ja alit oahpu guhkes áiggi plánas mearridit bajit dási ulbmiliid ja vuoruhemiid, maid mielde ráđđehus galgá nannet dutkama ja alit oahpu áigodagas 2015 - 2024.

Suorgeovddasvástádus ja bálddalastin

Norgga dutkanpolitihka vuođđun lea suorgeprinsihppa, mii mearkkaša ahte departemeanttain lea ovddasvástádus ovddidit ja geavahit ávkin dutkama, mii gullá sin ovddasvástádussuorgái. Dat dahká vealtameahttumin bálddalastit doaimmaid bures, nu ahte geavahit resurssaid beaktilit ja sihkkarastit ahte dutkamis lea servodahkii nu ollu ávki go vejolaš, go fuolahit dutkansurggiin suorgerájáid rastá. Guhkes áiggi plánen lea mávssoleamos reaidu, mainna sihkkarastit, ahte dutkama ja alit oahpu politihka bálddalastet ja ollašuhttet bures.

Stuorradiggedieđáhusat dutkama birra leat bidjan bajit dási rámmaid norgga dutkanvuogádahkii. Guhkes áiggi plána ulbmilat eai leat ruossariiddus bajit dási ulbmiliiguin, mat bohtet ovdan dutkandieđáhusain, mat leat ovddiduvvon Stoltenberg II-ráđđehusa áigge (St.dieđ. nr. 30 (2008–2009) Klima for forskning ja Dieđ. St. 18 (2013–2014 Lange linjer – kunnskap gir muligheter), dat baicce čiekŋudit daid ja vuoruhit nannoseappot guđe surggiin berre áŋgiruššat eanet.

Dutkanpolitihkka stáhtabušeahtas

Dutkamii juolluduvvo ruhta stáhtabušeahta oktavuođas juohke jagi. Nuba leatge departemeanttaid bušeahttaárvalusat mávssolaš dutkanpolitihkalaš dokumeanttat. Buot departemeanttat árvalit ruhtajuolludemiid dutkamii ja ovdánahttimii (DuO) iežaset bušeahttaárvalusain.

Máhttodepartemeantta bušeahttaproposišuvnnas lea oppalaš ovdanbuktin buot DuO-juolludemiin, mat leat sullii 30 miljárdda kruvnno 2015 stáhtabušeahta árvalusas.

Stuorámus áŋgiruššamat 2015-bušeahtas leat namuhuvvon neahttasiidduin, mat muitalit áŋgiruššamiid birra "Máhttu addá vejolašvuođaid buohkaide".

Dutkanpolitihkalaš strategiijat

Ráđđehus ovddida maid iešguđet dutkanpolitihkalaš surggiid strategiijaid. Riikkaidgaskasašvuohta guoskkaha buot dutkama osiid, ja Eurohpá dutkanovttasbarggus lea erenoamáš sajádat, go dat lea norgga dutkama mávssoleamos riikkaidgaskasaš arena. Nuba ráđđehus leage ovddidan strategiija, mii gieđahallá dutkan- ja innovašuvdnaovttasbarggu EU:in.