Foandaruđaid geavaheapmi boahttevaš jagiin
Artihkal | Maŋimuš ođasmahttojuvvon: 12.01.2024 | Ruhtadandepartemeanta
Doaibmanjuolggadusa áigumuš lea ahte oljodietnasiid ávkkástallan áiggi badjel galgá čuovvut Stáhta olgoriikka penšunfoandda vurdojuvvon reálavuoittu (SPO). Buot stáhta dietnasat oljo- ja gássadoaimmas galge biddjot SPO:ii ja geavaheapmi galggai čuovvut foandda vurdojuvvon reálavuoittu.
St. dieđ. nr. 29 (2016-2017) Perspektiivadieđáhusas 2017 dieđihii Solberg Ráđđehus ahte jagi 2018 rájes biddjo vuođđun 3 pst. vurdojuvvon reálavuoitu SPO:s, mii ovdal lei 4 pst. Olles stuorradiggi doarjjui dán. Njuolggadusaid sáhttá heivehit. Galgá deattuhit dásset ekonomiija rievddademiid, vai sihkkarastá buori kapasitehtaávkkástallama ja unnán bargguhisvuođa.
Meroštallamat, earret eará Perspektiivadieđáhusas 2021, čájehit ahte stáhtabušeahta dietnasat vurdojuvvojit šaddat unnibut jagi 2030 rádjái. Árvvoštallojuvvui ahte sihke petroleumdietnasat ja vearrodietnasat njidjet. Jus geahččá guhkkelii go 2030:i, de lassánit hástalusat goluid ektui álbmoga boarásmuvvama geažil. Vaikko leat leamaš hui alla gássahattit 2021-2022 áigodagas ja foandda árvu lea sakka lassánan 2023:s, de lea vuođđu jáhkkit ahte boahttevaš jagiin šaddá unnit vejolašvuohta geavahit foandaruđaid eanet go dan masa mii leat hárjánan maŋemus 20 jagis.
Go doaibmanjuolggadus ásahuvvui 2001:s, de deattuhuvvui ahte oljodietnasiid lassáneami ferte geavahit Norgga ekonomiija ovdánannákcii. Perspektiivadieđáhusa 2017 gieđahallamis čujuhii ovttajienalaš finánsalávdegoddi dasa ahte Stuorradiggi 2001:s deattuhii ahte oljodietnasat eai galgan šaddat ággan ii čađahit dárbbašlaš systemaođastusaid, ja oktasaš finánsalávdegoddi doarjjui 2021 váldovuoruheami ahte ruhtageavaheapmi galgá adnot infrastruktuvrii, máhttui ja vearrogeahpádusaide mat buktet ovdáneami.