Iežas ealiheami máksomearit

Ođđa iežas ealiheami máksomearit suoidnemánu 1. b. 2014 rájes.
Áššiin, mat mearriduvvojit vealgeortnetlága vuođul, velggolaš sáhttá doalahit oasi boađuinis orrungoluid ja geavahangoluid gokčamii (iežas ealiheapmái). Dál leat ođđa láhkaásahusas nannejuvvon iežas ealiheami máksomearit, mat gustojit suoidnemánu 1. b. 2014 rájes. Máksomeriid vuođul galget friddja árvvoštallat man ollu ruhta mearriduvvo iežas ealiheapmái.
Suoidnemánu 1. b. 2014 rájes gustojit dát máksomearit (kr. mánnui):

a)	kr 7 890 ovttaskas velggolažžii
b)	kr 6 680 velggolažžii, gii lea náitalan dahje eallá ovttas guimmiin
c)	kr 13 360 velggolažžii, gii ealiha náittosguoimmi dahje eallinguoimmi

Mánáid ovddas addet čuovvovaš lasáhusaid:

a)	kr 2 365 máná ovddas, gii ii leat deavdán 6 jagi
b)	kr 3 135 máná ovddas, gii lea 6 - 10 jagi
c)	kr 3 960 máná ovddas, gii lea 11 jagi dahje eanet

Loga olles láhkaásahusa.

Eanet dieđuid láhkaásahusa birra gávnnat geassemánu 13. b. 2014 gonagaslaš resolušuvnnas.

Ođđa láhkaásahus ii leat fámus maŋos guvlui áiggis, ja gusto dušše áššiin, main álggahit vealgesoabadallama suoidnemánu 1. b. 2014 maŋŋá. Vealgesoabadallamiin, mat álggahuvvojedje ovdal suoidnemánu 1. b. 2014, lea departemeantta johtučála Q8 /2010 ain fámus. Dat guoská maid álggahuvvon vealgeortnegiidda, main lea sohppojuvvon, ahte velggolaš galgá bidjat dan máksomeari, mii “guđege áigge” ain gusto, dahje sullasaččat (“dynámalaš vealgeortnet”). Dakkár ortnegiin eai nappo rievdat supmi nu guhká go ortnet lea fámus. Ođđa máksomearit eai geavahuvvo maid áššiin, main vealgeortnega rievdadit lága 6. kapihttala vuođul, jos vealgeortnet lea álggahuvvon ovdal suoidnemánu 1. b. 2014.
Leat sierra máksomearit velggolaččaide, geat ovttastallet iežaset mánáiguin, geain sis ii leat beaivválaš fuolaheapmi, vrd. johtučállaga Q8/2010 čuoggá 1.3 ja láhkaásahusa § 5. Johtučállaga Q08/2010 máksomearit heivehuvvojit suoidnemánu 1. b. 2013 láhkaásahusa mielde, mii guoská mánnádoarjaga mearrideapmái ja rievdadeapmái. Nuba johtučállaga Q8/2010 máksomearit mánáiguin ovttastallama oktavuođas leat seammát go láhkaásahusa § 5 mielde.