Diehtojuohkin geavaheddjiide

Diehtojuohkin lea okta deháleamos gaskaoapmi geavaheaddjipolitihkas. Geavaheaddjit galget oažžut buorre ja doarvái dieđuid gálvvuid ja bálvalusaid birra maid márkan fállá, ja bajásčuvgehusa iežaset vuoigatvuođaid birra. Diehtojuohkin ovddida geavaheaddjifámu ja dahká geavaheaddjái vejolažžan dahkat čuvgejuvvon mearrádusaid.

Geavaheaddjiráđđi

Geavaheaddjiráđđi lea geavaheddjiid beroštusorganisašuvdna ja bálvalusorganisašuvdna, ja deháleamos almmolaš geavaheaddjidieđuid gáldu.  Geavaheaddjiráđđi gaskkusta dieđuid geavaheddjiid vuoigatvuođaid birra gálvvuid ja bálvalusaid gávppašeamis, addá veahki jos šaddet riiddut, ja oaivada gálvvuid válljemiid dáfus. Geavaheaddjiráđđi gulahallá viidát geavaheddjiiguin Geavaheaddjiportála, Ruhtadanportála, Geavaheaddji Eurohpá, Geavaheaddjitelefovnna, reivviid ja e-poastta, váiddanammagottiid, ja guovllu kantuvrraid galledemiid bokte.  Geavaheaddjiráđđi lea stáhtalaš hálddašanorgána mas lea sierra fápmudus, ja lea Mánáid-, dásseárvo- ja searvadahttindepartemeantta vollásaš.

Ruhtadanportála

Ruhtadanportála lea doaibma mii fállá geavaheddjiide dieđuid ja buohtastahttá ruđalaš buktagiid ja bálvalusaid Norgga gávpemárkanis. Jos háliidat investeret, báŋkku molsut dahje dáhkádusa, dahje sáddet ruđaid olgoriikii, de lea portála ávkkálaš vuolggasadji gos oažžu ollislaš dieđuid fálaldagaid birra. Geavaheaddjiráđđi jođiha ruhtadanportála.

Geavaheaddji Eurohpá

Jos leat dihto váiddadilálašvuođas dahje riidoáššis mii guoská gálvvuide dahje bálvalusaide maid leat oastán ealáhusdolliin olgoriikkas EO:s ja Islánddas, sáhttá Geavaheaddji Eurohpá veahkehit. Geavaheaddji Eurohpá addá oppalaš dieđuid eurohpálaš geavaheaddji vuoigatvuođaid birra ja galgá veahkehit du gávdnat váiddanammagotti mii sáhttá meannudit du ášši.  Eurohpá-kommišuvdna ja Geavaheaddjiráđđi ruhtadit Geavaheaddji Eurohpá.  

Geavaheaddjiáittardeaddji

Geavaheaddjiáittardeaddji váldodoaibma lea bearráigeahččat ahte márkanfievrrideapmi ja šiehtaduseavttut čuvvot márkanfievrridanlága.  Áittardeaddji addá iežas neahttasiiddu bokte dieđuid geavaheddjiide ja ealáhusdolliide eastadan dihtii lobihis márkanfievrrideami ja atnimis lobihis šiehtadusaid. Erenoamážit deattuhuvvo juohkit dieđuid digitála márkanbáikkiid birra, ja neahttasiidduin gávnnat earret eará dieđuid persovdnasuoji, mo garvit neahttaskelbmošeami ja ruskadieđuid, ja gáibádusaid birra mat gusket mobiila sisdoallobálvalusaide.

SIFO

Stáhta Instituhtta Geavaheaddjidutkama várás (SIFO) lea dutkaninstituhtta mii erenoamážit deattuha gávpemárkandilálašvuođaid ja geavaheddjiid dili.  Instituhtta vuoruha iežas dutkanbohtosiid gaskkustit ja dieđuid juohkit ávkin eiseválddiide, ealáhuseallimii, organisašuvnnaide ja geavaheddjiide.  Bohtosat almmuhuvvojit instituhta neahttasiidduin, raportaráiddus ja našunála ja internašunála áigečállagiin.  Instituhtta lea stáhtalaš hálddašanorgána mas lea sierra fápmudusat ja lea Mánáid-, dásseárvo- ja searvadahttindepartemeantta vuollásaš, ja ruhtaduvvo vuođđodoarjagiin ja prošeaktaruđaiguin.   

Gálvomearkaortnegat

Norgga gávpemárkanis gávdnojit iešguđet lágan gálvomearkaortnegat geavaheddjiid várás. Álkiduvvon mearkavuogádagat ja dovddaldagat galget váikkuhit dasa ahte geavaheddjiin galgá šaddát álkit válljet gálvvuid gaskka. SIFO guorahallan jagi 2011 čájehii ahte eanaš geavaheaddjit oaivvildit ahte dovddaldagat ja mearkavuogádagat veahkehit sin buorebut válljet go ostet borramušgálvvuid.     

Njukča (Svanen)

Mánáid- ja dásseárvodepartemeanta vuođđudii vuođđudusa Miljømerking 1990:s hálddašit almmolaš birasmerkemiid Norggas; Njukča (Svanen) ja Lieđđi (Blomsten). Njukča lea davviriikkalaš oktasaš positiiva birasmerken ortnet, ja Lieđđi lea EO mearkaortnet. Goappašagat leaba dovdosat Norggas. Birasmerkejuvvon gálvvut ja bálvalusat čađahit objektiivvalaš birasárvvoštallama vuođđudusa ortnega bokte. Njukča fuolaha ollislaš birasperspektiivva  gálvvuin ja bálvalusain – álggu rájes gitta lohppii. Njukča merkejuvvon gálvvut leat máŋgga šlájat; earret eará buhtistanávdnasat, elfápmo buktagat, liggenpumppat ja bassaladdanmášiinnat, hoteallat ja restauránttat ja mánáid biktasat.  Ollislaš dieđut gávdnojit vuođđudusa neahttasiidduin ecolabel.no

Čoavddaráigi (Nøkkelhullet)

Čoavddaráigi lea davviriikkalaš doaibma mii vuođđuduvvui 2009:s, ja galgá álkkásmahttit geavaheddjiid válljet dearvvaš borramuša. Borramuš merkejuvvon Čoavddaráiggiin čájeha ahte borramušas lea uhcit buoidi, uhcit sohkar ja sálti, ja eanet fiber ja obbagordni go eará seamma sullasaš borramušain. Eavttuid oažžut borramuša merkema Čoavddaráigi, mearridit Norgga, Ruoŧa ja Dánska borramuš- ja dearvvašvuođaeiseválddit ovttas.  Dearvvašvuođadirektoráhta ja Biebmobearráigeahču vástideaba mearkaortnega Norggas.