Coronavirusa leavvan: Rávvagat ja cavgileamit mánáide ja bearrašiidda

Coronavirusa issoras leavvan lea fáhkka rievdadan min árgabeaivvi. Skuvllat ja mánáidgárddit leat giddejuvvon, eatnis ja áhčis soaitá leat ruovttukantuvra ja ollugat leat karantenas. Dás almmuhat muhtun rávvagiid váhnemiidda ja mánáide movt sii sáhttet hehttet coronavirusa leavvama.

Stoahkan, ovttastallan ja oktasašdoaimmat

Norgga dearvvašvuođaeiseválddit ávžžuhit ahte ii galgga diktit ollu mánáid čoahkkanit ovtta sadjái stoahkat dahje ovttastallat. Ulbmil lea doalahit gaskka eastadit dávdda njoammumis. Jos mánáin lea dárbu stoahkat eará mánáiguin, de ii galgga diktit stoahkat eanet go ovttain dahje guvttiin lagaš ustibiin ja dušše seamma ustibiin nu guhká go dávda sáhttá njoammut. Seamma gusto nuoraide maid. 

 

Muitte ahte stoahkan ja deaivvadeamit galget olgun dáhpáhuvvat. Garvve stoahkansajiid gos  ollu mánát leat čoahkkanan. Ávžžuhus doalahit ovtta mehtera gaskka gusto maid doppe. Basa gieđaid hui bures ja dávjá, sihke ovdal, stoagadettiin ja maŋŋil.

 

Muhtun mánát sáhttet vásihit ahte sii masset stoahkanustibiid dán áigodagas. Váhnemat berrejit fuolahit ahte mánát besset ovttastallet ja gulahallet eará vugiid bokte, nu go telefovnna, skype ja sullasaš reaidduid bokte.

Dáppe gávnnat eanet rávvagiid:

Dearvvašvuođadirektoráhta YouTubes: Dieđut mánáide ja nuoraide coronavirusa birra

 

Ung.no: Manne lea dehálaš ahte DON čuovut corona-rávvagiid?

Mánáidáittardeaddji: Geainna sáhtát hupmat coronoavirusa birra.

Mánáid- ja bearašministara rávvagat váhnemiidda coronavirusa birra (Facebook)

Mánát jearahalle stáhtaministara, mánáid- ja bearašministara ja máhtto- ja searvadahttinministara mánáid preassakonfereanssas

Jos háliidat lohkat stáhtaministara ja stáhtaráđiid álggahanovdaságaid preassakonfereanssas, de sáhtát dan dahkat dáppe:

Stáhtaministtar

Mánáid- ja bearašministtar

Máhtto- ja searvadahttinministtar

 

Mánáin geain ii leat oadjebas dilli ruovttus

Mii diehtit ahte buot mánát ja nuorat eai dovdda oadjebasvuođa ruovttus. Dál go skuvllat ja mánáidgárddit leat giddejuvvon, de fertejit ollu bearrašat eallit hui lahkalagaid. Lea hirbmat dehálaš fuola atnit ahte buot mánáin lea buorre dilli, ja ahte váhnemat geat dárbbašit veahki, ohcet veahki.

 

Jos dieđát máná dahje váhnemiid geat dárbbašit veahki, de sáhtát čuojahit Mánáidsuodjalusa alárbmatelefovdnii 116 111. Dat lea rabas birra jándora, ja sii háliidit veahkehit. Čuojat vaikko eahpidat.

Mánát ja nuorat sáhttet váldit oktavuođa soames rávisolbmuin geasa luhttet, jos vásihit juoga mii sin mielas lea unohas. Ohppiin lea ain vejolaš váldit oktavuođa iežaset skuvlla oahpaheddjiin dahje skuvladearvvašvuođabálvalusain, jos dárbbašit hupmat váttis áššiid birra.   

Dárbbašat go earáiguin hupmat dahje chattet? Dáppe gávnnat telefovdnanummiriid ja chattenbálvalusaid mat sáhttet leat ávkkálaččat.

Oahpponeavvut ja pedagogalaš spealut

Ollu kulturásahusat fállet máinnasbottuid, teáhterčájálmasaid ja eará doaimmaid neahta bokte. Gávdnojit ollu Facebook-joavkkut geat rávvejit ja lágidit doaimmaid maid mánáiguin sáhttá bargat ovttas vai beaivvit eai šatta nu guhkit/ja mat áiggi oanidit.

Lea vuogas juohkit beaivvi bargamušaid mielde ja struktureret beaivvi jos vel lehpet ge ruovttus.

Muitte ahte buhtes áibmo ja beaivválaš lihkadeapmi lea dearvvašlaš. Muhto muitte doallat gaskka earáide. 

Jos dus leat gažaldagat oahpahusdahkosiid hárrái, de váldde oktavuođa iežat skuvllain.  

Geahča maid dieđuid mat gávdnojit Oahpahusdirektoráhta neahttasiidduin:

Rávvagat dasa mo dii sáhttibehtet čađahit oahpahusa ruovttus

Dieđut giddejuvvon skuvllaid ja mánáidgárddiid birra

Dieđut coronavirusa leavvama ja mánáidgárddiid, skuvllaid ja alitoahpahusa birra.