Filbmadoarjagat

Audiovisuála buvttadeamit leat dehálaš kultuvrralaš gulahallangaskaoamit ja dáiddalaš ovdanbuktinvuogit. Lea dehálaš gozihit ahte audiovisuála alladási filmmat sihke dárogillii ja sámegillii buvttaduvvojit nannen dihtii dárogiela, identitehta ja kultuvrra, ja ahte dat leat buohkaide olámuttus.

Filbmasuorggi váldoulbmil lea de buvttadit iešguđetlágan filmmaid maid vuođđun lea dárogiella, kultuvra ja servodateallin, ja buorre kvalitehta, dáiddalaš duostilvuohta ja ođđahutkan, mat hástalit ja jukset ollu gehččiid Norggas ja olgoriikkas. Ulbmil ollašuvvo vuosttažettiin Norgga filbmainstituhta doarjjaortnegiid bokte.

Filbmasuorggi doarjjaortnegat

Norgga filbmainstituhtta hálddaša doarjagiid. Norgga filbmainstituhtta (NFI) galgá Kulturdepartemeanta mearridan mihttomeriid, rámmaid ja resurssaid vuođul ollašuhttit stáhtalaš filbmapolitihka. 

Audiovisuála buvttademiid oktavuođas NFI hálddaša stáhtalaš gaskaomiid čuovvovaš surggiin:

  • Ovddideapmi
  • Buvttadeapmi
  • Distribušuvdna
  • Almmuheapmi
  • Filbmakultuvra

NFI doaibmá departemeantta ráđđeaddin namuhuvvon surggiin.

NFI juolluda doarjagiid audiovisuála buvttadusdoarjagiid  láhkaásahusa vuođul ja giehtačállosiidovddideami ja oahpahusvuđot doaibmabijuid láhkaásahusa vuođul, ja hálddaša  eará riikkaidgaskasaš doarjjaortnegiid. NFI galgá juohkit dieđuid ja bagadallat filbmasuorggi njuolggadusaid ja doarjjaortnegiid birra.

NFI hálddaša maid eará doaimmaid, nugo ovddastit ja juohkit dieđuid norgga filmmaid birra, riikka siste ja olgoriikkas, gaskkustit filbmaárbbi jna.

Regionála filbmadoaimmat

Departemeanta juolluda doarjagiid regionála filbmaguovddážiidda ja regionála filbmafoanddaide. Regionála filbmaáŋgiruššandoaibma lea oassi oktasaš nationála filbmapolitihkas.

Guovlulaš filbmaguovddážat galget geavahit stáhta doarjagiid ovddidit ja buvttadit oanehis filmmaid, dokumentárafilmmaid, ráhkadit dihtorspealaid, báikkálaš gealbodoaimmaid ja mánáid ja nuoraid doaimmaid. Guovlulaš filbmaguovddážis ferte leat bures sajáiduvvan  filbmabiras ja politihkalaš doarjja báikkálaš ja regionála dásis.

Regionála filbmafoanddat galget geavahit stáhta doarjagiid ovddidit ja buvttadit kinofilmmaid, oanehis filmmaid, dokumentára filmmaid ja tv-ráidduid ja ráhkadit dihtorspealuid. Stáhtadoarjja juolluduvvo dainna eavttuin ahte regiovnnat juolludit seamma ollu báikkálaš/regionála foandaruđaid regionála filbmafoanddaide. Regionála filbmafoanddaid ruhtadoarjjaortnet lea geahččalanortnet mii gusto gitta 2015 lohppii, dassá go boahttevaš stuoradiggedieđáhus filmmaid birra mearriduvvo.

Doarjagiid maid regionála filbmaguovddážat, regionála filbmafoanddat ja Riikkaidgaskasaš sámi filbmainstituhtta ožžot ii leat vejolaš geavahit jođiheapmái. Norgga filbmainstituhtta lea Kulturdepartemeanttas ožžon válddi máksit, bearráigeahččat ja čuovvolit jna. regionála filbmaguovddážiid ja regionála filbmafoanddaid doarjagiid.