Mediapolitihkka

Stáhta bajimus ovddasvástádus mediasuorggis lea ovddidit cealkinfriddjavuođa ja demokratiija dan bokte, ahte láhčet dili rabas ja dihtui vuođđudeaddji almmolaš ságastallamii, nu mo vuođđolágas § 100 celkojuvvo.

Eiseválddit galget ovddidit buori ođasbuvttadeami ja viidát láhččojuvvon almmolaš ságastallama dálá ja boahtteáigge digitála mediaservodagain. Doaimmahuslaš hivvodatmediat leat mávssolaš oassi almmolaš ságastallama infrastruktuvrras. Eiseválddit galget láhčit dili rabas ja máŋggabealat infrastruktuvrii man olis lonohallat ođđasiid ja juohkit dieđuid ja oaiviliid servodaga buot osiin. Dakkár lonohallama haga demokratiija ii doaimma.

Sihke ekonomalaš gaskaoamit (omd. mediadoarjja) ja muddengaskaoamit (omd. sisdoalu unnimusgáibádus ja eaiggátvuođa njuolggadusat, ovddasvástádusa sajušteapmi ja doaimmahuslaš sorjjasmeahttunvuohta) veahkehit Norgga doaimmahuslaš hivvodatmediaid olahit máŋggabealatvuođa ja kvalitehta ulbmiliid.

Manin mediadoarjja?

Mediagirjáivuohta lea rabas ja demokráhtalaš servodaga dehálaš eaktu. Okta mediadoarjaga ulbmiliin lea danin doalahit máŋggabealat ođas- ja áigeguovdilis mediaid. Mediadoarjja lea okta vuohki, mainna stáhta ollašuhttá Vuođđolága § 100 guđát lađđasa nu gohčoduvvon infrastruktuvragáibádusa, mas celkojuvvo ahte: ”Stáhta eiseválddit leat geatnegasat láhčit dili rabas ja dihtui vuođđudeaddji almmolaš ságastallamii.”

Mediageahčču hálddaša Kulturdepartemeantta mediasuorggi doarjjaortnegiid.

Mediadoarjagii gullet čuovvovaš ortnegat:

- Buvttadandoarjja ođas- ja áigeguovdilis mediai

- Doarjja vahkkoáviissaide

- Doarjja sámi áviissaide

- Doarjja unnitgielaid almmuhusaide 

- Doarjja báikkálaš áibmomediai

Kulturdepartemeanta doarjjaortnegiid lassin báberáviissat ožžot eahpenjuolga mediadoarjaga, go eai dárbbaš máksit lassiárvodivada. Lassiárvodivat gullá Ruhtadandepartemeantta ovddasvástádussuorgái.

Mediageavaheapmi nuppástuvvá

Stáhta galgá dađistaga árvvoštallat gaskaomiidis mediasuorggis, go álbmoga mediadábit leat sakka nuppástuvvamin. Statistihka guovddášdoaimmahaga logut čájehit, ahte buot árbevirolaš hivvodatmediaid geavaheapmi njiedjá ja ahte ain eambbosat dan sadjái geavahit nuvttá resurssaid neahtas. Go árbevirolaš mediaid geavaheapmi geahppána, de mediat eai oaččo nu ollu boađuid geavaheddjiin ja máidnosiin, mii fas váttásmahttá resursagáibideaddji journalistihka ruhtadeami.

Mediagirjáivuođalávdegoddi lea árvvoštallan makkár ulbmilat stáhtas berrejit leat mediagirjáivuođa ektui, ja lea árvvoštallan Norgga oppalaš mediafálaldaga ovdáneami mávssoleamos sárgosiid ektui. Mediagirjáivuođalávdegoddi almmustahtii iežas NAČ njukčamánu 7. b. 2017.

Loga Mediagirjáivuođalávdegotti árvalusaid (girjedárogillii)