Eaktodáhtolašvuođapolitihka birra

Nana siviila suorggis lea dehálaš mearkkašupmi go galgat sihkkarastit friddjavuođa, šláddjivuođa ja fápmodássádaga servodagas.

Eaktodáhtolaš bálvalusat ja almmolaš bálvalusat

Eaktodáhtolašvuohta lea máŋga čuođi jagi leamašan čálgoođasteaddjin. Vel odnege olmmošlaš návccat ja njuovžilis organiseren dagaha ahte eaktodáhtolaš organisašuvnnat nagodit dustet hástalusaid, fuomášit dakkaviđe go veahkkedárbu čuožžila sihke riikka siste ja olgoriikkain, ja doaimmahit veahkkebarggu nu movt eai gallis eará dan nagot doaimmahit. Ráđđehus háliida buoremus lági mielde láhččet vejolašvuođa eaktodáhtolaš suorgái, ja dan dehálaš servodatávkkálašvuhtii maid eaktodáhtolaš bargu doaimmaha.

Eaktodáhtolašvuohta ásaha šláddjivuođa , dat hástala ja dagaha erohusa olbmuid eallimis.

Lea lassiárvu go berošta ja doaimmaha juoge earáid ovddas, dat dagaha ilu go berošta ja ásaha luohttevašvuođa olbmuid gaskkas. Dat go olbmot beroštit ja váldet ovddasvástádusa lagasbirrasis, eastada oktonasvuođa ja hukse searvevuođa.

Eaktodáhtolašvuođas lea iešárvu danin go dan vuođđu lea olbmuid empatiija, beroštupmi, veadju ja áŋgirvuohta.

Maid háliida ráđđehus eaktodáhtolašvuođain?

Eaktodáhtolašvuođas lea guovddáš sajádat ráđđehusa ovttasbargovuođus. Dat lea integrerejuvvon oassi measta buot politihkkasurggiin ja namuhuvvo máŋggaid ráđđehusvuođu kapihttaliin. 

Ráđđehus háliida eaktodáhtolaš suorggi mii ahtanuššá vuođu rájes ja luvvejuvvo politihkalaš stivrejumis. Danin lea ráđđehus almmuhan ovttasdoaimma áigumušjulggaštusa gaskal ráđđehusa ja eaktodáhtolaš suorggi.

Čoavddasánit dán oktavuođas leat:

  • Árvu – ráđđehus dohkkeha eaktodáhtolašvuođa stuorra árvvu servodathuksejeaddjin.
  • Doaibma – ráđđehus áigu láhččet vejolašvuođa eaktodáhtolaš suorgái ahtanuššat vuođu rájes ja dohkkeha ahte sorjjasmeahttunvuohta politihkalaš stivrejumis lea dehálaš jus gálga aktiivvalaš eaktodáhtolaš suorggis.
  • Mielváikkuheapmi – ráđđehus áigu láhččet rabas, ealli ja konstruktiiva gulahallama eaktodáhtolaš surggiin
  • Geahpideapmi – ráđđehus áigu láhččet álkibut njuolggadusaid ja unnidit byrokratiija eaktodáhtolaš surggiin gulahallamis
  • Iešheanalašvuohta –ráđđehus dohkkeha eaktodáhtolašvuođa iešheanalašvuođa sajádaga servodagas