Sosiálaveahki vuostáiváldiide geatnegasvuohta searvat doaimmaide

Ráđđehus evttoha, ahte gielddat fertejit gáibidit, ahte olmmoš gii oažžu sosiálaveahki galgá maid searvat doaimmaide.

Ulbmilin lea nannet doarjjavuostáiváldi vejolašvuođaid beassat bargui ja ealihišgoahtit iežas. Ráđđehus oaivvilda ahte doarjaga passiiva vuostáiváldin ii leat vuogas olbmui iige servodahkii. Gielddat sáhttet sosiálabálvaluslága vuođul gáibidit ahte olmmoš, geasa juolluduvvo ealihandoarjja, galgá searvat doaimmaide. Gielddat dattetge geavahit dán vejolašvuođa hui iešguđet dásis.

Doaimmaide searvama ulbmilin lea nannet olbmo vejolašvuođaid beassat bargui ja ealihit iežas. Gielddat, main bidjet gáibádusaid, leat buorit bohtosat, erenoamážit nuorra sosiálaveahki vuostáiváldiid guovdu.

 

Ovttalágan geavadat gielddain

Ráđđehus háliida ahte gielddain galgá leat ovttalágan geavat dán suorggis, ja ahte gielddat fertejit gáibidit buot doarjjavuostáiváldiid, geat sáhttet, searvat doaimmaide, mat ráhkkanahttet bargui.

Láhkaevttohusa mielde gielddat fertejit árvvoštallat ohcci vejolašvuođaid searvat doaimmaide, ja fállat heivvolaš doaibmafálaldaga. Muhtun gielddat fertejit lágidišgoahtit doaimmaid, mat sis eai ovdal leat leamaš. Doarjjavuostáiváldit sáhttet searvat sihke gielddaid, stáhta ja priváhta doaimmaide.

Gielddat fertejit árvvoštallat ohcci vejolašvuođaid searvat doaimmaide ja maiddái makkár doaimmaide son galgá searvat. Jos eai gáibit olbmo searvat doaimmaide, de mearrádus galgá ákkastallojuvvot.

Čavgadut čuovvoleapmi

Árvalus mielddisbuktá, ahte doarjaga vuostáiváldi čuovvoluvvo čavgadeappot. Gielddat besset ieža válljet mo láhčet doaimmaid ja mo čuovvulit olbmuid. Olbmot soitet searvat gieldda lágidan doaimmaide, muhto maiddái stáhta doaimmaide dahje doaimmaide, maid eará lágideaddjit fállet, sosiála entreprenevrrat, oahppoásahusat dahje earát.

Čuovvumušat

Jos doarjaga vuostáiváldi ii searvva doaimmaide, de láhkaárvalus mielddisbuktá, ahte gielda sáhttá geahpedit doarjaga.

Departemeanta lea ožžon ollu buriid cealkámušaid láhkaárvalusa hárrái gulaskuddaninstánssain, ja daid čuovvolit go barget viidáseappot proposišuvnnain.