Bargonávccahisvuođaoadju

Ođđa bargonávccahisvuođaoadju boahtá fápmui 2015, ja buhtada dálá bargonávccahisvuođapenšuvnna. Ođđa bargonávccahisvuođaoajuin lea álkit ovttastahttit oaju ja barggu.

 

Dán áigge rehkenastet bargonávccahisvuođapenšuvnna seamma vugiin, go ahkepenšuvnna. Ođđa bargonávccahisvuođaoaju rehkenastet dan vuođul, mii lea leamaš gaskamearálaš boahtu golmma buoremus jagi áigge oktiibuot viđa jagi áigodagas ovdalgo olmmoš návccahuvai. Bargonávccahisvuođaoadju galgá leat 66 proseantta ovddeš boađuin, ja dat galgá vearuhuvvot bálkká láhkai. Ođđa vearuhannjuolggadusat gusket dálá bargonávccahisvuođapenšunisttaide ja sii ožžot ođđajagemánu 1. b. 2015 rájes stuorát bargonávccahisvuođadoarjaga ovdal vearu.

Álkit ovttastahttit oaju ja barggu

Ođđa bargonávccahisvuođaoadju mielddisbuktá ahte šaddá álkit ovttastahttit bargonávccahisvuođaoaju ja barggu: Bargonávccahisvuođaoadju geahpeduvvo bargodietnasa ektui, muhto ii rievdat bargonávccahisvuođa dási vaikko bargodienas šaddáge eanet go friddjasupmi veardde.

Bargonávccahisvuođaoaju sajis galgá oažžugoahtit ahkepenšuvnna, go deavdá 67 jagi. Ahkepenšuvdna čoaggana 62 jagi rádjái sis, geaidda ođđa álbmotoaju dinenmálle gusto.

Gii oažžu bargonávccahisvuođaoaju?

Bargonávccahisvuođadoarjagiid ulbmil lea sihkkarastit dietnasa, mainna ealiha iežas, dakkár olbmuide, geaid dienasnávccat leat bistevaččat hedjonan unnimusat 50 proseanttain buohcuvuođa, vahága dahje liittu geažil. Olbmuid guovdu, geat ožžot bargočielggadanruđaid bargonávccahisvuođaoaju ozadettiin, lea doarvái ahte dienasnávccat leat bistevaččat hedjonan unnimusat 40 proseanttain. Bargonávccahisvuođaoaju juolludit, jos lea áibbas čielggas, ahte dienasnávccat eai buorrán, ja go leat geahččalan ulbmillaš dálkkodeami ja bargui ráhkkanahtti doaimmaide.

Eanet dieđut ođđa bargonávccahisvuođaoaju birra

Don gávnnat lasi dieđuid ođđa bargonávccahisvuođaoaju birra siiddus www.nyuføretrygd.no.