Dilli fágaskuvllain

Dál lea nu ahte sullii 60 proseantta fágaskuvllain Norggas leat priváhta ásahusat, ja badjel bealli gávdnojit stuorit báikkiin lulli Norgga nuortaoasis.

Suorggi dilleraporta addá departementii, fágaskuvlasuorgái ja eará berošteddjiide vejolašvuođa árvvoštallat suorggi ovdánandovdomearkkaid.

Fágaskuvlasuorggis leat 111 fágaskuvlla, sullii 750 iešguhtetlágan oahppofálaldaga, ja badjelaš 16 000 fágaskuvlastudeantta. 2012 rájes lea fágaskuvlastudeanttaid lohku lassánan 3,6 proseanttain.

Fágaskuvllat fállet máŋggalágan oahpuid iešguđet fágasurggiin. Jahkásaččat čađahit sullii 5 000 oahppi fágaskuvlaeksámena.

Fágaskuvlasuorggis leat ollu priváhta eaiggádat mii muđui ii leat nu dábálaš norgga oahppovuogádagas.

 - Dán suorggi dilleraporta addá departementii, fágaskuvlasuorgái ja eará berošteddjiide vejolašvuođa árvvoštallat suorggi ovdánandovdomearkkaid, cealká máhttoministtar Torbjørn Røe Isaksen.

Fágaskuvlalávdegoddi, maid Máhttodepartemeanta nammadii diibmá, lea ožžon mandáhttan geahčadit fágaskuvlla sajádaga oahppovuogádagas, oahppokvalitehta, fágaskuvllaid rolla bargoeallima gelbbolašvuođa dárbbuid ektui dál ja boahtteáiggis, fágaoahpuid ruhtadeami, sisabeassangáibádusaid ja ovttasbarggu fágaskuvllaid ja universitehta- ja allaskuvlasuorggi gaskka.  Lávdegotti raporta galgá gárvvistuvvot 2014 mielde ja lea hui dehálaš fágaskuvlasuorggi ovddidanbarggus.  

Máhttodepartemeanta lea maid ásahan ekspeartajoavkku guorahallat lágaid ja njuolggadusaid mat gusket priváhta allaskuvllaide ja fágaskuvllaide. Joavku galgá gárvvistit barggustis 2014 mielde.