Ráđđehuskvartála ođđasishuksen

Ráđđehuskvartála ođđasishuksenbarggut leat álggahuvvon. Lea váttis dadjat man galle jagi mannet ovdal go ođđa ráđđehuskvartála lea sajis. Ráđđehus háliida rabas proseassa ovdal go dehálaš mearrádusat dahkkojuvvojit.

Ráđđehuskvartála ođđasishuksenbarggut leat álggahuvvon maŋŋil suoidnemánu 22.b.2013 dáhpáhusa. Ráđđehus Stoltenberg lea mearridan ahte eanaš departemeanttat galget čohkkejuvvot dálá ráđđehuskvartálii ja ahte ráđđehuskvartála huksenbarggut galget čađahuvvot stáhtalaš regulerenplánaid mielde.

Ovdal go ráđđehus mearrida ođđasishuksemii konseaptačovdosiid, earret eará gosa ođđa ráđđehuskvartála galgá huksejuvvot, de galgá čađahuvvot nu gohčoduvvon konseaptaválljenčielggadus (KVČ) ja dasto galgá konseaptaválljejumis čađahuvvot  kvalitehtasihkkarastin,(KS1). Leat olgguldas konsuleanttat geat čađahit kvalitehtasihkkarastinbarggu, gč. Ruhtadandepartemeantta rámmašiehtadusa stáhtalaš investeremiid olgguldas kvalitehtasihkkarastima birra. Loga eanet KS1 birra (pdf) (dárogillii).

Konseaptaválljenčielggadus ovddiduvvui geassemánu 27.b. 2013. Kvalitehtasihkkarastinbargu lea vuordimis válmmas 2014 álggogeahčen.

Konseaptaválljenčielggadus ja KVČ-kvalitehtasihkkarastin galget de biddjot vuođđun ráđđehuskvartála boahtteáiggi   viidáset divaštallamiidda ja ráđđehusa loahpalaš mearrádusaide go galgá konseapta válljet.  Ovdalis leat juo dahkkon máŋga čielggadeami ja árvvoštallama mat maiddái galget biddjot vuođđun konseaptaválljejupmái, ja maiddái oaivilat maid guoskevaččat leat dovddahan. Departemeanta áigu árvvoštallat lea go dárbu joatkit čielggadanbargguid, kártemiid jna. ovdal go konseaptaválljejupmi dahkko.

Plánaproseassa

Plána- ja huksenlágas gávdnojit láhkamearriduvvon gáibádusat mat gustojit čielggadandárbbuide ja gulaskuddamiidda. Lága mihttomearri lea okta dat ahte buot áššáiguoskevaččat ja eiseválddit galget diehtit plánabargguid ja mearrádusaid birra, ahte lea rabasvuohta, einnostahttivuohta ja searvanvejolašvuohta.  Plánaproseassa lea dehálaš vai guoskevaččat besset ovddidit oaiviliiddiset.

Ráđđehuskvartála huksenbargu galgá čađahuvvot stáhtalaš regulerenplána vuođul. Dat mielddisbuktá ahte eiseválddiid ovddasvástádus mearridit regulerenplána sirdojuvvo Oslo gielddas Birasgáhttendepartementii. Plána- ja huksenlága láhkamearriduvvon gáibádusat mat gustojit rabasvuhtii ja searvanvejolašvuhtii galget čuvvojuvvot jos vel ráhkaduvvoge stáhtalaš regulerenplána.

Ođđa ráđđehuskvartála lea nu viiddis ahte dasa gusto plána- ja huksenláhkamearriduvvon gáibádus mii guoská váikkuhusčielggademiide. Dat mielddisbuktá ahte vuosttažettiin galgá regulerenplánii mearriduvvot plánaprográmma.   Plánaprográmmas čilgejuvvojit earret eará searvanvejolašvuođat ja čielggadandárbbut. Plánaprográmma galgá biddjot almmolaš geahčadeapmái, ja gulaskuddanáigemearri galgá leat unnimus guhtta vahku. Mearriduvvon plánaprográmma galgá biddjot vuođđun ráhkadit regulerenárvalusa ja dasa gullevaš váikkuhusčielggadeami. Regulerenplána galgá čielggadit ja mearridit gávpotplánarámma ođđa ráđđehuskvartála viidáset huksemii.  Plánaárvalus oktan váikkuhusčielggademiin galgá sáddejuvvot dábálaš gulaskuddamii ja biddjot almmolaš geahčadeapmái ja gulaskuddanáigemearri galgá leat unnimus guhtta vahku.

Ođđa ráđđehuskvartála huksenproseassa

Lea váttis dadjat justa man galle jagi gollet ovdal go ođđa ráđđehuskvartála lea sajis. Jagi 2013 lea prošeakta čielggadandásis, gč. govvačilgehusa dás vuollelis. Čielggadandásis ráhkaduvvo konseaptaválljenčielggadus ja čađahuvvo vel kvalitehtasihkkarastin (KS1). Go ráđđehus lea dohkkehan konseaptta, de álggahuvvo ovdaprošeakta. Mearriduvvon konseaptaválljejumi vuođul  galgá ovdaprošeakta earret eará konkretiseret viidáset huksenbargguid. Ovdaprošeaktaáigodagas biddjojuvvo arkiteaktagilvu johtui. Mo dat galgá čađahuvvot mearriduvvo maŋŋá.

Ovdaprošeavttas ráhkaduvvo ee. golloárvvoštallan ja eará stivrenreaiddut ođđa ráđđehuskvartála viidáset bargui. Ovdaprošeakta galgá de kvalitehtasihkkarastojuvvon nu gohčoduvvon KS2 bokte ovdal go ovddiduvvo Stuoradiggái, mii de mearrida bušeahttarámma.  Stuoradiggi galgá oažžut dieđuid bargguid ovdáneami birra jahkásaš bušeahttaproposišuvnnaid bokte.

Guoskevaš dokumeanttat (dárogillii):

2013:

2012: