Jobbsjansen (bargovejolašvuohta)

Ortnega ulbmil lea lasihit daid sisafárrejeddjiid barggolašvuođa, geat eai buoril olat bargomárkana vejolašvuođaid, ja geat eai gula eará ortnegiidda.

2013 ásahuvvui Jobbsjansen bistevaš ortnegin. Jobbsjansen vuođđun leat vásáhusat, mat čoggojedje geahččalanortnegis, man namma lei Ny sjanse. Ny sjanse lea šaddan Jobbsjansen oassin. Searvadahttin- ja girjáivuođadirektoráhtas (SGDis) lea ovddasvástádus čuovvolit ortnega. 

Ulbmiljoavku

Ortnega ulbmiljovkui gullet buot 18-55-jahkásaš sisafárrejeaddjit, geat dárbbašit vuođđogealbudahttima, ja geain eai leat oktavuođat bargoeallimiin, ja geat eai gula eará gustovaš ortnegiidda. Sisafárrejeaddjinissonat, geat leat ruovttus, ja geat eai leat sorjavaččat sosiálaveahkis, vuoruhuvvojit Jobbsjansen-ortnegis. 

Olbmot, geat leat mielde dahje gealbbuset dáfus sáhtášedje leat mielde NBČ Gealbudahttinprográmmas, eai gula Jobbsjansenii. Dan eai maid daga olbmot, geain lea vuoigatvuohta láidestanprográmmii láidestanlága vuođul.

Gealbudahttima sisdoallu

Prográmma galgá heivehuvvot oktagaslaččat ja dan galgá nu guhkás go vejolaš lágidit láidestanlága ja dasa ráhkaduvvon rávvagiid ja ávžžuhusaid vuođul. Prográmmat galget nannet bargui searvama gelbbolašvuođa, dárogielmáhtu ja áddejumi norgga servodaga birra. Prográmmaid vuođul galget sáhttit oažžut bistevaš bargooktavuođa ja ruđalaš iešbirgejumi.

Ny sjanse (Ođđa vejolašvuohta)

Ny sjanse olis lágidedje geahččaleapmin gealbudahttinprográmma sisafárrejeddjiide, geat eai lean ožžon bistevaš bargooktavuođa, vaikko ledje orron máŋga jagi Norggas. Ulbmilin lei oažžut oassálastiid ruđa dáfus iešbirgejeaddjin barggu dahje oahpu bokte. 

Bargovuogit, maid geahččaledje Ny sjanse olis, ja maiguin barge viidáseappot Jobbsjansen-ortnegis, leat seammát go láidestanprográmmas, ja daidda gullá kártet, oktagaslaš plána čállit, okta gulahallanolmmoš, ollesáigeprográmma, gealbudahttindoarjja, njuolggadusat dan ektui jos ii beasa searvat doaimmaide, ja čavga oktagaslaš čuovvoleapmi. Váldodoaimmat ledje giellaoahpahus, bargohárjehallan ja oahpahus servodaga birra. 

Eanet dieđut Jobbsjansena birra, Ny Sjanse vásáhusaid birra, buorit ovdamearkkat ja dieđut bargovugiid birra, girjjálašvuohta ja doarjjadieđut gávdnojit SGDi ruovttusiidduin.