Báhtareddjiid ásaiduhttin

Sii geat ásaiduhttojuvvojit, leat ovddeš asylaohccit geat leat ožžon lobi orrut, dahje sirdinbáhtareaddjit geat ožžot orrut Norggas šiehtadusa mielde maid ON allakomiseara báhtareddjiid várás lea dahkan.

Suohkanat ásaiduhttet báhtareddjiid

Báhtareaddjit geat dárbbašit veahki ásaiduvvat, galget oažžut orohatfálaldaga ovtta suohkanis. Searvadahttin- ja girjáivuođadirektoráhtta áimmahuššá ovttasbarggu suohkaniiguin ásaiduhttima birra.  

Sii geat ásaiduhttojuvvojit, leat ovddeš asylaohccit geat leat ožžon lobi orrut, dahje sirdinbáhtareaddjit geat ožžot orrut Norggas šiehtadusa mielde maid ON allakomiseara báhtareddjiid várás lea dahkan.  Sirdinbáhtareaddjit ásaiduhttojuvvojit njuolga ovtta suohkanii go bohtet Norgii.

Ovttaskas, vuolleahkásaš báhtareaddjit vuollel 15 jagi

Mánáid-, nuoraid- ja bearašdirektoráhtas lea ovddasvástádus ovttaskas, vuolleahkásaš báhtareddjiin vuollel 15 jagi geat bohtet Norgii. Mánát ožžot orrun- ja fuolahusfálaldaga heivehuvvon fuolahusguovddážiin. Ásaiduhttimis sin geat leat ožžon orrunlobi lea Searvadahttin- ja girjáivuođadirektoráhtas ovddasvástádus háhkat suohkansaji buot ovttaskas báhtareddjiide vuollel 18 jagi, maiddái nuoramusaide. Mánáid-, nuoraid- ja bearašetáhtas, dat mearkkaša direktoráhta guovllukantuvrrain, lea ovddasvástádus konkrehta ásaiduhttit sin geat leat vuollel 15 jagi. Etáhta bajimuš ulbmil lea ásaiduhttit mánáid rievttes suohkanii, rievttes doaimmain ja golmma mánu sisa maŋŋil go orrunlohpi lea mearriduvvon. Dáinna ipmirduvvo dat suohkan mii eanemus lágiin áimmahuššá máná fuolahus- ja veahkkedárbbuid, mii vuhtiiváldá máná fuolkevuođadilálašvuođa ja mii lea heivehuvvon máná ahkái.

Nationála lávdegoddi mearrida ásaiduhttindárbbu

Lávdegoddi mearrida ásaiduhttindárbbu easkkaboahtán báhtareddjiide boahttevaš jagis. Lávdegoddi juogada báhtareddjiid juohke fylkkas. Vuođđun juogadeapmái lea fylkkaid olmmošlohku, gealbudanfálaldagat, orohatmárkan, makkár vásáhusat leat ovddeš ásaiduhttinbargguin, báhtareaddji sávaldat orrunbáikki birra, lassin bargovejolašvuođaide. Nationála lávdegotti jođiha Searvadahttin- ja girjáivuođadirektoráhtta, ja lávdegottis leat stáda ja suohkansuorggi áirasat.

Johtilit ásaiduhttin

Mihttomearri ásaiduhttit johtilit mielddisbuktá ahte báhtareaddjit galget ásaiduhttojuvvot ovtta suohkanii guđa mánu sisa maŋŋil go sidjiide leat miehtan orrunlobi. Ovttaskas mánáide ja nuoraide lea mihttomearri golmma mánu sisa.

Geahččalanortnet Hordaland ja Østfold fylkkain

Jagiin 2015 ja 2016 čađahuvvo geahččalanortnet man ulbmil lea lassanan ja johtilet ásaiduhttin suohkaniin dien guovtti fylkkain. Geahččaleapmi mearkkaša ahte dien guovtti fylkkamánneámmáhiin lea ovddasvástádus movttiidahttit suohkaniid dien guovtti fylkkain lasihit ásaiduhttinsadjelogu go suohkan galgá árvvoštallat galle báhtareaddji sii sáhttet ásaiduhttit juohke jagi. Searvadahttin- ja girjáivuođadirektoráhtas bissu ovddasvástádus konkrehta ásaiduhttinbarggus, nappo persovdnadásis.   

Ovttaiduhttindoarjja suohkaniidda

Suohkanat ožžot ovttaiduhttindoarjaga go ásaiduhttet báhtareddjiid ja olbmuid geat leat ožžon orrunlobi humanitára sivaid geažil. Dasa lassin ožžot suohkanat doarjaga ovttastahttit dáid joavkkuid bearraša, sihke sin geat bohtet Norgii váldopersovnnain oktanaga ja sin geat ovttastahttojit maŋŋil. Ovttaiduhttindoarjja galgá gokčat suohkana gaskamearálaš lassigoluid ásaiduhttimii ja ovttaiduhttimii ásaiduhttinjagis ja njeallje čuovvovaš jagiin. 

Ovttaiduhttindoarjaga máksomeriid gávdnojit Searvadahttin- ja girjáivuođadirektoráhta ruovttusiiddus.