Suorgeáŋgiruššan

Almmustahttináigodat Solberga ráđđehus

Almmustahtti: Mánáid-, dásseárvo- ja searvadahttindepartemeanta

Muhtun guovlluin, main leat stuorra, máŋggadáfot eallindillehástalusat, stáhta ja gielda leat bargagoahtán oktasaš áŋgiruššamiin.

Groruddalen ja Søndre Nordstrand Oslos, Siskkit Oslo nuortaoassi Oslos, Fjell Drammenis, Saupstad Troandimis ja Årstad Bergenis leat guovllut, main stáhta ja gielda áŋgiruššet ovttas ášši ovdii. Ulbmilin lea dásset eallindili erohusaid ja movttiidahttit searvat báikkálaš servodahkii ja olles servodahkii. 

Stáhta stuorámus doaimmat, maiguin ovddidit eallindiliid, leat Groruddal-áŋgiruššan ja Oslo Sør-áŋgiruššan Søndre Nordstrand gávpotoasis Oslos, ja dain geahččaladdet oanehis áigodagain nuvttá mánáidgárdesajiid (váimmusáiggiid). Viessobáŋku maid addá ruđa Groruddalena guovloáŋgiruššamii.

Nuvttá váimmusáigi mánáidgárddis

2006 rájes leat geahččaladdan nuvttá váimmusáiggiin mánáidgárddis, ja dat lea leamaš mávssolaš vuohki movttiidahttit geavahit mánáidgárddiid guovlluin, main leat máŋggadáfot eallindillehástalusat ja ollu unnitlogugielat mánát. Váldoulbmil lea ráhkkanahttit mánáid skuvlii álgimii ja váldun galgá leat dárogiela oahppan. Buot vissis jagiid riegádan mánáide leat fállan nuvttá áiggi mánáidgárddis njeallje diimmu beaivái, oktiibuot 20 diimmu vahkkui. Mánáidgárddiid nuvttá váimmusáiggi geahččalemiiguin álge 2006 Stovnera gávpotoasis Oslos. Ortnet lea dađistaga viiddiduvvon. 

Borgemánu 2014 rájes rievdadedje osiid geahččaladdamis nu, ahte ulbmiljoavkun šadde bearrašat, main leat vuollegis boađut boares Oslo gávpotoasis, Bergenis ja Drammenis. Seammás gáibidišgohte, ahte geahččaladdamii searvan mánáid váhnemat galge oassálastit doaimmaide. 2015 áigge fállet mánáidgárddi nuvttá váimmusáiggi buot riikka 4- ja 5-jahkásaččaide, geaid bearrašiin lea vuollegis boahtu. 

Fafo ja SGD leat árvvoštallan mánáidgárddiid nuvttá váimmusáiggi geahččaleami.