Kulturdepartemeanta ja Norgga girku

Kulturdepartemeanttas lea etáhtaovddasvástádus báhppabálvalussii, bismii, bismagodderáđđái ja Girkoráđđái. Ođđajagimánu 1.b.2017 rájes sirdojuvvojit dát doaimmat Norgga girku ođđa riektesubjektii.

Praktihkalaš-teologalaš seminára sirdojuvvo Oslo universitehtii ođđajagimánu 1.b.2017, ja Girkolaš oahppoguovddáš davvin (KUN) sirdojuvvo Norgga girkui. Ođastusa viidáset barggu sáhttá čuovvut min neahttasiidduin:  "Hálddašanođastus mii bidjá čielga rájáid girku ja stáhta gaskka”.  

Kulturdepartemeanta hálddaša Nidaros Domkirkes Restaureringsarbeider ja Čuvgehusdoaimmahaga foandda ođđajagimánu 1.b.2017 rájes. Departemeanta galgá maid ovddasvástidit soahtehávddiid Norggas ja norgga soahtehávddiid olgoriikkas.

Departemeanta hálddaša ollu lágaid ja láhkamearrádusaid, nu go girkolága, hávdelága, lága Čuvgehusdoaimmahaga foandda birra ja bassebeaivvelága.

Departemeanta lea dál čielggadeamen ollislaš láhkaárvalusa osku- ja eallinoaidnoservodahkii, masa gullá maid Norgga girku. Láhkaárvalus  galgá plána mielde sáddejuvvot gulaskuddamii jagi 2017. Seamma áiggis lea stuoradiggedieđáhusa bargu boahtteáiggi osku- ja eallinoaidnopolitihka birra jođus.