Historjjálaš arkiiva

-Oaidná Norgga čovdosiidda rabas lihtolažžan

Historjjálaš arkiiva

Almmustahttináigodat Solberga ráđđehus

Almmustahtti: Suodjalusdepartemeanta

Odne suodjalusministtar Ine Eriksen Søreide deaivvadii USA suodjalusministariin Chuck Hageliin Pentagonas. –Munnos lei hui buorre ja konstruktiiva čoahkkin ja leimme goabbáge ovtta oaivilis das, ahte Atlántta rasttildeaddji ovttasbargu lea mávssolut go goassige, Eriksen Søreide dadjala.

Odne suodjalusministtar Ine Eriksen Søreide deaivvadii USA suodjalusministariin Chuck Hageliin Pentagonas. –Munnos lei hui buorre ja konstruktiiva čoahkkin ja leimme goabbáge ovtta oaivilis das, ahte Atlántta rasttildeaddji ovttasbargu lea mávssolut go goassige, Eriksen Søreide dadjala.

USA:s finadettiin suodjalusministtar lea máŋgga čoahkkimis váldán ovdan lassáneaddji ja máŋggadáfot sihkarvuođapolitihkalaš hástalusaid, mat min ovddabealde leat. Dál go sihkarvuođapolitihka suorgi nuppástuvvá sakka, de lea Atlántta rasttildeaddji guimmešvuohta mávssolaš vuohki dáhkidit sihkarvuođa. -Hagel nannii dan munno ságastallamis, suodjalusministtar dadjala.

Norga bargá oasis
- Moai letne Hageliin odne digaštallan ollu áššiid, ja namuhan Atlántta rasttildeaddji sihkarvuođapolitihka, áigeguovdilis NATO-áššiid, operašuvnnaid, Norgga beroštumiid dáistalangirdiid háhkamis, Amerihká politihka, davveguovlluid ja USA “rebalanserema” Ásia ja Jaskesmeara guovllus. Norga lea mearridan leat mielde guorpmi geassimin sihke NATO:s ja Atlántta rasttildeaddji ovttasbarggus. Vai juvssašeimmet dan ulbmila, mii bargat máŋga ášši. Mii investeret ain Suodjalussii. Mii leat háhkan ođđa fregáhtaid, mii leat háhkagoahtán ođđa máŋgga rolla dáistalangirdiid, ja ođasmahttit ain eanansuodjalusa. Dat kapasitehtat leat Norgii ávkin, muhto mii leat maid válljen dahkat investeremiid, vai daid bokte doarjut NATO ja min oktasaš sihkarvuođa, suodjalusministtar cealká.

Hagel bealistis beroštii missiilasuodjalusas ja das mo NATO lea dorjon dan vuogádaga. Lea čielggas, ahte dat lea amerihkálaččaid beales okta mávssoleamos ja bajimužžii vuoruhuvvon prošeavttain. Missiilasuodjalus lea čielgasit guovddážis Atlántta rasttildeaddji ovttasbarggus dás ovddos guvlui, ja das leat stuorra váikkuhusat resurssaide. Leat máŋga searvanvuogi, ja ráđđehus joatká ovddit ráđđehusa barggu ja identifisere molssaeavttuid, Eriksen Søreide dadjala.

Buorre ovttasbargu
Guokte suodjalusministara namuheigga maid máŋga eará suorggi, main USA ja Norga ovttasbarget bures, earret eará Amerihká ovdavuorkkát Norggas ja goappáge riikka hárjehaddamat. Norga doarju dan, ahte NATO:s oidnet mávssolažžan hárjehallat eanet ovttas (nu gohčoduvvon Connected Forces Initiative, maid NATO njunuščoahkkin ovddidii 2012). Dan riikkat dahket, vai sihkkarastet operašuvnnalaš ovttasbarggu, go Afghanistána operašuvdna joavdá ođđa muddui 2014 maŋŋá. ‑Almmuhin čielgasit Hagelii, ahte Norga áigu áŋgireappot bargat NATO ovdii ja nannet dan. Norggas láhčet dilálašvuođaid NATO-doaimmaide ja dasa ahte NATO sáhttá doaibmat Norggas.

Guorahallanovttasbargu
Norga ja USA barget bures ovttas dieđuid guorahallamiin. Ovttasbargu lea mávssolaš Norgga ja riikkaidgaskasaš sihkarvuhtii. Lea čielggas, ahte Snowdena diehtosuođđan lea fuolastahttán sakka Eurohpá. Mihkkige ii čájet, ahte Norgga ássiid livčče vákšon lobi haga. –Lean váldán ášši ovdan máŋgga ságastallamis dáppe Washingtonas, ja lean suokkardallan ášši maiddái suodjalusministtar Hageliin odne. Sii atnet árvvus, ahte Norga ovdanbuktá čielgasit oaivilis, Eriksen Søreide dadjala. –Norga ja USA jotket dieđusge ovttasbarggu, ja lea mávssolaš, ahte mis lea čielga njuolggogulahallan Amerihká eiseválddiiguin dáid fáttáin. Vákšunášši čájeha earret eará man ollu ođđa hástalusaid riikkaidgaskasaš ja teknologalaš ovdáneapmi mielddisbuktá, maiddái NATO-lihtolaččaid gaskii, suodjalusministtar cealká.

Rábmui Norgga barggu Syrias
Syria birra lei maid sáhka, ja Hagel rábmui Dánmárkku ja Norgga barggu dan oktavuođas go dat leat dál fievrredeamen Syria kemihkalaš vearjjuid. Eriksen Søreide bealistis rábmui USA njunušrollas, mii das lea vearjjuid jávkadeami oktavuođas. –Hagel deattastii, ahte son oaidná Norgga konstruktiiva lihtolažžan, mii lea gearggus gávdnat máŋggabealat čovdosiid, ja mii čájeha dáhtu ja návccaid árvalit konkrehta doaimmaid ja čuovvulit daid, suodjalusministtar Ine Eriksen Søreide loahpaha.