Historjjálaš arkiiva

1 miljárda kruvnno lasáhus eaktodáhtolašvuođa ja valáštallama buhtadusortnegii

Historjjálaš arkiiva

Almmustahttináigodat Solberga ráđđehus

Almmustahtti: Kulturdepartemeanta

Dál sáhttet eaktodáhtolaš searvvit ohcat buhtadusa boađuin, maid eai oaččo doaluin, mat ledje plánejuvvon juovlamánu 31. b. rádjai 2020.

Láhkaásahus gaskaboddasaš buhtadusortnega birra mii lea eaktodáhtolaš- ja valáštallansuorggi várás COVID-19-njoammuma geažil (dárogillii, Forskrift om midlertidig kompensasjonsordning for frivillighets- og idrettssektoren som følge av COVID-19-utbruddet) (Lovdata)

– Valáštallan- ja eaktodáhtolaš suorggis leat čájehan nana dáhtu ja návccaid doalahit doaimmaid vaikko leat ráddjehusat, ja lean movtta go mii sáhttit ain doarjut sin, dadjá kultur- ja dásseárvoministtar Abid Q. Raja.

Njoammuneastadandoaimmat leat sakka čuohcán valáštallan- ja eaktodáhtolaš suorgái. Ollu doaimmat ja lágideamit eai lágiduvvo, dahje dat leat maŋiduvvon njoammuneastadanávžžuhusaid geažil dahje dearvvašvuođaeiseválddiid gáibádusaid geažil.

Leat jo máksán eanet go 1,2 miljárdda kruvnno buhtadussan servviide, mat leat massán stuorra boađuid lágidemiin ja eará doaimmain, mat leat ollásit dahje muhtun muddui gártan doalakeahttá, giddejuvvon dahje maŋiduvvon eiseválddiid gáibádusaid ja ávžžuhusaid geažil.

Dá leat juolludan vel 1 miljárdda kruvnno ortnega guhkideapmái gitta jagi lohppii, ja láhkaásahus lea dál gárvvis.

Buhtadusortnet joatkašuvvá dakkárin go dat lea leamaš dássážii, leat divustan dušše muhtun unnit osiid. Dat mearkkaša ahte buhtadusa sáhttá ohcat dan vuođul, makkár boađuid leat massán adnojuvvon dávviriid gávppiin, láigohemiin, valáštallanrusttegiid bileahttaboađuin ja eará fálaldagain. Njunušvaláštallama gilvobeivviid boađuid buhtadit maid bileahttaboađuid lassin.

– Ollu searvvit miehtá riikka leat ohcan buhtadusa doaluid vuođul, maid ledje plánen čakčamánu 1. beaivvi rádjai. Mii oaidnit ahte ortnet veahkeha sihke servviid mat leat massán ollu ja servviid mat leat massán unnit boađuid. Dál mii movttiidahttit sin lágidit doaimmaid ja bálkkašit sin, geat geahččalit ollašuhttit iežaset doaimmaid, dadjá Abid Q. Raja.

Dál movttiidahttet lágidit doaimmaid ja geahpeditge 50 prosentii buhtadusa lágidemiin ja eará doaimmain, mat báhcet ollásit lágitkeahttá skábmamánu 1. b. rájes gitta juovlamánu 31. beaivvi rádjai.

Sidjiide, geat ollašuhttet doaimmaid, buhtadit 70 proseantta massojuvvon boađuid nettosupmis maiddái skábmamánu 1. b. rájes. Ulbmilin lea ahte ohccit birgejit buorebut ruđalaččat go sii lágidit doaluid njoammuneastadannjuolggadusaid mielde, go jos sii leat lágitkeahttá doaluid.

Lotteriija- ja vuođđudusgeahčus lea ain ovddasvástádus ortnega hálddašeames, ja sii mákset ohccojuvvon ruđaid dađistaga, nu mo dássážii. Ohcanskovvi rahpasa vahkus 43.