20 miljovnna ruvnno kulturulbmiliidda juolluduvvo spealloruđain
Historjjálaš arkiiva
Almmustahttináigodat Solberga ráđđehus
Almmustahtti: Kulturdepartemeanta
Preassadieđáhus | Almmustahtton: 21.08.2015 | Maŋimuš ođasmahttojuvvon: 31.08.2015
Ráđđehus lea odne juohkán 19,98 miljovnna ruvnno kulturulbmiliidda Norsk Tipping A/S ruhtaliiggis. 12,23 miljovnna ruvdno juolluduvvo kultuvrralaš skuvlalávka nannema várás, 6,25 miljovnna ruvnno álggahanprojektii mii galgá sihkkarastit eanet doaimmaid kulturviesuin Norgga Kulturviessofierpmádaga bakte, ja 1,5 miljovnna ruvnno riikkaviidosaš musihkkaorganisašuvnnaide.
Norgga Kulturviessofierpmádat
Ráđđehus háliida eanet doaimmaid riikka kulturviesuin, ja juolluda 6,25 miljovnna ruvnno báikkálaš ja guovlulaš áŋgiruššamiidda nuoraide. Álggahanprojeakta Kulturrahttát Norgga Kulturviessofierpmádaga bakte galgá leat doarjjan daid bargguide ja doaimmaide mat dáhpáhuvvet kulturviesuin miehta riikka. Nu ođđa kulturviesuid ásaheapmi čuovvoluvvo ja deattuhit sisdoalu.
- Kulturrahttát galget addit nuorra easkaálgi dáiddáriidda olles riikkas buori ovdánahttinvejolašvuođaid. Kulturviesut leat dehálačča eallinfámolaš ja girjás báikkálaš kultureallimii. Dát projeakta galgá leat mielde nannemis kultuvrralaš vuođđogeađggi ja bidjat eanet sisdoalu daid rávvagiid mielde mat ovdanbohtet Kulturčielggadeamis, dadjá kulturministtar Thorhild Widvey.
Kultuvrralaš skuvlalávka
Kultuvrralaš skuvlalávkka nuppástuhttima oktavuođas dat nannejuvvo 12,23 miljovnna ruvnno sturrosaš juolludemiin. Ruđat juhkkojuvvojit fylkkasuohkaniidda seamma juohkominstara mielde go dat mii lea adnon ovddit jagiid váldojuogadeamis.
- Dáidda ja kultuvra hábme min olmmožin, ja min ráđđehusjulggaštusas deattuhuvvo ahte mánáide ja nuoraide galgá sihkkarastojuvvot vejolašvuohta vásihit buriid kulturvásáhusaid. Go kultuvrralaš skuvlalávka nuppástuhttojuvvo ja nannejuvvo 12,23 miljovnna ruvnnuin, de mii buoridit kvalitehta ja hivvodaga das maid mii fállat nuoraide, cealká kulturministtar Thorhild Widvey.
Preassadieđáhus "Kultuvrralaš skuvlalávka nannejuvvo" 2015 borgemánu 18. beaivvi rájes
Doarjja riikkaviidosaš musihkkaorganisašuvnnaide
Ráđđehus juolluda liige 1,5 miljovnna ruvnno riikkaviidosaš musihkkaorganisašuvnnaid doibmii ja aktivitehtaide. Doarjaga juohká Norgga Musihkkaráđđi.
- Norgga musihkkaeallimis lea alla kvaliteahta, stuora šáŋŋergovdodat ja nana eaktodáhtolaš oasálastin. Riikkaviidosaš musihkkaorganisašuvnnat barget dehálaš barggu láhččomis buori musihkkaeallima. Vai sin bargu nannejuvvo de juolluduvvo velá liige 1,5 miljovdna Norsk Tipping liiggis Norgga Musihkkaráđi doarjjaortnegii, dadjá kulturministtar.
Norsk Tipping váldočoahkkin várrii 3536,1 miljovnna ruvnno mii dán jago galgá juhkkojuvvot tihppema juogadančovdosa vuođul.