Stáhtabušeahtta:

70 miljovnna kruvnna kultuvrralaš ja dáiddasuorggi ealáhusaide

Ráđđehus háliida láhčit dili kultursuorggi lassáneapmái ja ovdáneapmái ja áigu nannet dáiddáriid vejolašvuođaid dinet eanet. Juolludeamit kultuvrralaš ja hutkás ealáhussii lasihuvvojit danne badjel 70 miljovnnain kruvnnain.

Innovašuvdna Norgga hálddahuslaš Anita Krohn Traaseth, Kulturráđi direktevra Kristin Danielsen ja kulturministtar Linda Hofstad Helleland.
Innovašuvdna Norgga hálddahuslaš Anita Krohn Traaseth, Kulturráđi direktevra Kristin Danielsen ja kulturministtar Linda Hofstad Helleland. Govva: Wenche Nybo/Kulturdepartemeanta

- Dáidaga ja kultuvrra jearru ii leat goassige leamaš stuorát. Norggas leat taleanttat ja dáiddabuvttadeapmi mii doallá alla riikkaidgaskasaš dási, muhto mis leat ain stuorra vejolašvuođat hábmet ođđa bargosajiid, dadjá kulturministtar Linda Hofstad Helleland.

Ráđđehus áigu leat mielde lasiheamen priváhta bargguid ja investeremiid kultursuorggis ja láhčit dili ceavzilis kultursurggiide miehtá riikka. Doaibmi ja hábmejeaddji dáiddáriid gaskaoapme- ja doarjjaapparáhta nannema lassin friddja suorggis mii háliidat váikkuhit dasa ahte norgga dáidda ja kultuvra olaha eanet olbmuid.

- Doaibmabijut maid mii evttohat, galget leat mielde loktemin norgga dáidaga ja norgga taleanttaid, seammás go bohtet sisaboađut ruovttoluotta hábmejeaddji doibmii miehtá riikka, dadjá kulturministtar Linda Hofstad Helleland.

Vuoruheapmi fátmmasta buot surggiid ja lea aktevrraid várás geat leat olggobealde ásahuvvon ásahussuorggi.

  • 30 miljovnna kruvnna erenoamážit vuoruhit kultuvra- ja dáiddasuorggi ealáhusaid Innovašuvdna Norggas. Guovddáš doaibmabijut leat gealboprográmma, loatnaortnet, fitnodatfierpmádat, eksportaprográmma ja investorforum. Vuoruheapmi galgá váikkuhit oažžut eanet investeremiid norgga dáiddabuvttademiide, taleanttaide ja vuoigatvuođaide.
  • Norgga kulturráđđi oažžu bargun ásahit kantuvrra Oslo olggobeallái, Kreativt Norge. Kreativt Norga galgá bargat nannet máhtu ja áddejumi dáidaga ja dáiddásuorggi ealáhusaid árvoháhkanvejolašvuođain, ja addit vejolašvuođaid lasihit dáiddalaš sisaboađuid ásahuvvon ásahussuorggi olggobealde. Evttohuvvo 7 miljovnna kruvnna ásaheapmái.
  • 10 miljovnna kruvnna ortnegii mii galgá váikkuhit regionála suorgeovdáneapmái. Ortnega galgá Kreativt Norge áimmahuššat, ja dan galgá juohkit seamma olu Davvi-Norgii, Gaska-Norgii, Oarje-Norgii, Mátta-Norgii ja Nuorta-Norgii. 
  • Norwegian Arts Abroad vuollásaš ortnegat nannejuvvojit 6 miljovnnain kruvnnain ulbmillaččat vuoruhit dáiddáriid internašunaliserema apparáhta addit norgga kulturbuktagiidda ja -bálvalusaide stuorát beassanlági riikkaidgaskasaš márkaniidda.
  • Riikkaidgaskasaš filbma- ja ráidobuvttademiid intensiivaortnet Norggas evttohuvvo lasihuvvot sullii 11 miljovnnain kruvnnain.
  • Doarjja digitaliserendoaibmabijuide báikkálašrádiosektorii evttohuvvo lasihuvvot badjelaš 5 miljovnnain kruvnnain.
  • Regionála filbmavuoruheami vuoruheapmi bisuhuvvo ja nannejuvvo 4 milj. kruvnnain ásahit filbmaguovddášfálaldaga Osloi.
  • Doarjja Internašunála Sámi Filbmainstituhttii evttohuvvo lasihuvvot 0,5 milj. kruvnnain nannet sámi audiovisuála buktosiid buvttadeami ja gaskkusteami.