Mii rievdadat fuođđolága ja dahkat bivddu beaktileabbon ja eanet humána

Stuoradiggi lea mearridan osiid rievdadit fuođđolágas, go háliida vuhtiiváldit humána bivddu. Rievdadusat mearkkašit earret eará ahte dál lea lohpi geavahit goanstačuovgga go lea ohcamin báhččon sarvvaid, ja go lea dárbu goddit ealli mii lea darvánan gillárii. Dasto šaddá lobálaš geavahit mohtorfatnasa ohcat báhččon mearralottiid, ja lohpi geavahit goanstačuovgga ruksesriebana seaktebivddus. Bivdis lea geatnegasvuohta dieđihit jos áigu geavahit goanstačuovgga ohcat báhččojuvvon sarvva ja mohtorfatnasa ohcat báhččojuvvon mearralottiid. Láhkarievdadus fápmuduvvo geassemánu 1.b.2014.

-Láhkarievdadusat galget buoridit elliidčálggu ja beaktileappot  bivddu. Go rievdadusat ledje gulaskuddamis, de ledje ollugat positiiva rievdadusaide, ja Stuoradiggi lea ovttajienalaččat dorjon árvalusaid. Lean ilus go rievdadusat dál dohkkehuvvojit ja fápmuduvvojit, cealká dálkkádat- ja birasministtar Tine Sundluft.

Láhkarievdadusat mearkkašit ahte Dálkkádat- ja birasdepartemeanta sáhttá mearridit láhkaásahusa mii addá lobi geavahit goanstačuovgga maiddái eará oktavuođain.

Dasto lea vel dahkkon muhtun eará rievdadusat luonddušláddjivuođalágas ja eará lágain, dainna ulbmilin ahte čielggasmahttit riektedili ja njulget boasttuvuođaid.  Okta rievdadus lea earret eará váldit láhkii fas mielde mearrádusa mii gieldá oaguheames elliid dárbbašmeahttumit.

-Mu mielas dat lea dehálaš elliidčálggu  vuhtiiváldimis ahte luonddušláddjivuođaláhka sisttisdoallá njuolggadusa mii gieldá oaguheames elliid dárbbašmeahttumit, cealká Sundtoft.

Gielddus leai ovdal mielde elliidlágas, muhto boasttuáddejumi geažil sihkkojuvvui dalle go luonddušláddjivuođaláhka fápmuduvvui 2009.