Guovtteriikkagaskasaš suodjalusdoaimmat Ruoššain bissehuvvojit dán jahkái

Almmustahttináigodat Solberga ráđđehus

Almmustahtti: Suodjalusdepartemeanta

Norga bisseha Ruoššain buot plánejuvvon guovtteriikkagaskasaš doaimmaid dán jagi olggos.

Norga bisseha Ruoššain buot plánejuvvon guovtteriikkagaskasaš doaimmaid dán jagi olggos.

Ráđđehus mearridii njukčamánus bissehit buot plánejuvvon guovtteriikkagaskasaš doaimmaid miessemánu lohppii, ja dan maŋŋil dat galget fas árvvoštallojuvvot ođđasit.

-Maŋŋil Krim vuollásteami, mii lea álbmotrievtti vuostá,  lea Ruošša váikkuhan dasa ahte Ukrainas lea šaddan ain eanet eahpesihkkaris dilli. Ráđđehus lea mearridan botket buot  plánejuvvon guovtteriikkagaskasaš doaimmaid  olggos dán jagi, cealká suodjalusministtar Ine Eriksen Søreide.

Dat mearrádus lea Norgga lagamus lihtolaččaid oaiviliid mielde. Ovttasbarggu bisseheapmi olggos dán jagi mearkkaša geavatlaččat ahte plánejuvvon 15 gallestallama ja doaimmat, mat ledje plánejuvvon čakčat 2014, eai čađahuvvo. Ovdamearkka dihte:

  • Ruošša suodjalushoavdda gallestallan
  • Sáttagottiid ságastallamat mearrasuodjalusa ovttasbarggu birra
  • Guovtteriikkagaskasaš ámmátgaskasaš ságastallamat 

Muhtun ovttasbargosuorggit bissot 

Ovttasbargu riddobearráigeahčuin ja rádjebearráigeahčuin joatkašuvvet, nu maid Incidents at Sea-šiehtadus. Oktavuohta Suodjalusa doaibmi váldoguovddáža ja Ruošša Davvisoahtefatnasiid gaskka  bisuhuvvo. Dat dahkko vai buohkaid sihkkarvuohta mearraguovlluin vuhtiiváldojuvvo ja vai stáđisvuohta ja einnostahttivuohta bisuhuvvo min lagašguovlluin. 

Ávvudit Nuorta-Finnmárkku friddjavuođa

Čakčii leat mii plánen olu doaimmaid ávvudit ahte dassá lea 70 jagi áigi go Ruošša besttii Nuorta-Finnmárkku Nazi-Duiskka soađis čakčat 1944. Daid doaimmaid háliida Norga čađahit plánaid mielde.  Ráđđehus oaivvilda ahte lea prinsihpalaš earru suodjalusa ovttasbargodoaimmain ja doaimmain mat leat čadnon historjjálaš ávvudemiide ja veteránaguoskevaš áššiide.