Lasihit doaibmannávcca ja kvalitehta fuolahusbálvalusas

Ráđđehus áigumuš lea buoridit doaibmannávcca ja kvaliteahta fuolahusbálvalusain, vai ovddasguvlui galgat sáhttit fállat buoret bálvalus go maid odne dahkat.

- Lea buorre go vuorasolbmuid lohku lassána ja ahte vuorasolbmot ellet ja bissot dearvvašin guhkit áiggi. Ráđđehus áigu láhččet vejolašvuođa vuorrasiidda eallit aktiivvalaš eallima. Muhto maiddái galget gávdnot buori fuolahusbálvalusat ja buhcciidruovttusajit go dárbu čuožžila, cealká dearvvašvuođa- ja fuolahusministtar Bent Høie.

Buorideames kvalitehta, gelbbolašvuođa ja válljenfriddjavuođa fuolahusbálvalusain, de ráđđehus 2015 evttoha čuovvovaš surggiid nannet bušeahtas:

• 199 miljovnna ruvnno háhkandoarjjan birrajándor fuolahansajiide. Ruđat galget gokčat vuosttaš jagi máksámuša mieđihuvvon doarjagis lotnahuvvamiidda, ođasmahttimii ja huksemis 2500 birrajándora fuolahansajiid.
• 62 miljovnna ruvdno 1070 ođđa beaiveaktivitehtasajiide ruovttus orru demeansabuhcciide jagi 2015:s. Dasa lassin lea 2020 demeansaplánabargu álggahuvvon. Buohccit ja oapmahaččat galget aktiivvalaččat leat mielde plánabarggus.
• 20 miljovnna ruvdno geahččalanortnegii mas stáhta ollásit ruhtada fuolahanbálvalusaid. Daid suohkaniidda mat besset leat mielde geahččaleamis ožžot sierra sisaboahtolasáhusa.
• 30 miljovnna ruvdno juolludat bargui ahte ovdánahttit oktasaš dearvvašvuođaregistara suohkanlaš dearvvašvuođa - ja fuolahusbálvalusaide. Dát daga eanet máhtolašvuođa ja rabasvuođa fuolahusbálvalusaid kvaliteahtas.
• 300 miljovnna ruvdno vuoigatvuođanannema čuovvoleapmái geavaheaddjistivrejuvvon persovnnalaš veahkis (BPA) Gieldda- ja ođasmahttindepartemeanta bušeahta bakte.
• 12,5 miljovnna ruvdno alitdási joatkkaoahpahussii masterdásis buohccidivššáriid várás vai gelbbolašvuohta suohkana dearvvašvuođa- ja fuolahusbálvalusas nannejuvvo.

– Sihkkarastimis nanu fágalaš fuolahusbálvalusa de láhččojuvvo gelbbolašvuođaloktema plána Gealboloktema 2020 bakte. Plána galgá sisttisdoallat sisriikkalaš strategiijaid earret eará oahpu, rekruterema ja dutkama hárrái, dadjá Høie.