Mánáid vuoigatvuođat oažžut veahki nannejuvvojit

Láhkarievdadusa ulbmil lea buoridit máná fuolahusdili ja eastadit garrasit čuohcci fuolaváldinmearrádusaid.

-Váhnemat leat deháleamos olbmot máná eallimis, ja mii háliidat ahte mánná galgá bajásšaddat váhnemiiddis luhtte, cealká mánáid-, dásseárvo- ja searvadahttinministtar Solveig Horne. – Dat lea mánnái buoremus ahte sii geat dárbbašit veahki ožžot dan ruovttus. Dat sáhttá hehttet ahte mánáidsuodjalus váldá máná fuolahussii maŋit áiggi.

Ođđa veahkkedoaimmat

Departemeanta árvala gulaskuddannotáhtas geatnegahttit čađahit golbma ođđa áigeráddjejuvvon váldodoaimma. Dat eaktuda ahte eaktodáhtolaš doaimmat galget vuos geahččaluvvon dahje árvvoštallojuvvon.

• Veahkkedoaimmat
  Ulbmil lea geahpedit máná váttisvuođaid ja álggahit doaimmaid mat sáhttet arvvosmahttit máná ádjánit astoáiggedoaimmaiguin. Veahkkedoaimmat sáhttet leat ahte orrut eará sajis go ruovttus, duddenveahkki, astoáiggedoaimmat, veahkki skuvlabargguide dahje doarjjaolmmoš. 

• Fuolahusbuorideaddji doaimmat
  Ulbmil lea váhnemiidda addit veahki vai sii nákcejit máná fuolahit dainna lágiin ahte son  positiivvalaččat ovdána. Doaimmat sáhttet leat iešguđetlágan váhnenbagadallamat.

• Dárkkistandoaimmat
  Ulbmil lea dárkkistit ahte mánná ii illástuvvo dahje gillá eará duođalaš veahkaváldima. Doaimmat sáhttet leat gužžaiskkadeamit ja dieđihangeatnegasvuohta, omd. boahtit lihtoduvvon báikái dahje gáibádus doallat telefovdnaoktavuođa mánáidsuodjalusbálvalusain. 

Veahkkedoaimmaid álggaheapmi almmá váhnemiid mieđiheami haga sáhttá sakka čuohcat váhnemiidda ja bearrašii, muhto fuolaváldinsirdin čuohcá vel eanet, dadjá mánáidministtar. – Buot ovddemus ferte máná dárbbuid vuhtiiváldit, ja dan geažil eai sáhte váhnemat caggat addimis dárbbašlaš veahki.

Departemeanta oaivvilda ahte riektesihkarvuohta ferte vuhtiiváldojuvvot ja dan geažil berre mearridanváldi bisuhuvvot fylkkanammagottis, muhto gulaskuddannotáhtas bivdá dasa buktit oaiviliid.

 

Bearráigeahčču ruovttuin deattuhuvvo

Gulaskuddannotáhtas árvaluvvo vuolidit duođaštangáibádusaid ruovttu bearráigeahču oktavuođas. Dál sáhttá mearridit bearráigeahču dušše jos dat čavga mearriduvvon fuolaváldinsirdima eavttut leat devdojuvvon. Árvaluvvon rievdadusaiguin oažžu mánáidsuodjalus vejolašvuođa álggahit bearráigeahču ruovttuin ovdalgo dilli šaddá nu duođalaš ahte ferte máná sirdit eará fuolahussii.